Стоглава Гидра

автор мария перкович 26. фебруар 2018

Вецей подїї у януару спричинєли писанє „Антифашистичного преглашеня“, котре подписали Союз антифашистох Войводини, Нєзависне дружтво новинарох Войводини, Горватски граждански союз, Войводянски клуб и Желєна мрежа Войводини.

„…Зоз блаценя и сатанизациї нєистодумнїкох прешло ше на їх прешлїдзованє и ликвидацию. На мети: политични процивнїки, новинаре котри виглєдую зявеня у дружтве и критикую, мировни и феминистични орґанизациї и ґрупи, поєдинци котри шлєбодно думаю (…) За атмосферу страху, одсуство шлєбоди виражованя и правдивого диялоґу у дружтве думаме же найодвичательнєйша власц котру персонификує предсидатель Републики Сербиї Александар Вучич“, стої, медзи иншим у „Антифашистичним преглашеню“.

Медзитим, судзаци по числу подписнїкох, тото Преглашенє нє ма широку потримовку, бо по пияток 2. фебруара, шейсц днї после його обявйованя, вон мал лєм дацо вецей од 350 подписи.

Тото прецо Преглашенє нє ма широку потримовку источашнє и єдна з причинох ситуациї о котрей ше у нїм пише, а то – нєдостаток орґанизованей политичней моци котра би ше спроцивела тей политичней системи. Нє думам на шицки можлїви и нєможлїви щипаня Демократскей странки (ДС), або новоформовани странки котри ше волаю опозиция. Капанє и розщипканосц ДС, як и марґиналносц шицкого цо спада до парламентарней опозициї, нє резултат борби спроцивених идеолоґийох, алє фракция єдней истей идеолоґиї. Сербска напредна странка лєм закончує тото цо ДС започала з реставрацию капитализма, за котри держава, пре лоґику тей истей системи, лєм вивершна власц – ище од Луя Бонапарти у Французкей, прейґ „историйного фашизму“, та по нєшка.

Источашнє, цивилне дружтво од котрого и пришло тото Преглашенє, на жаль, представя лєм меншину дружтва. Меншину зоз штреднєй класи (котра знова и ту меншина) и углавним приходзи зоз державней бирократиї, цо значи же им нє приходзи на розум же би ше спроцивели, або самоорґанизовали, на цо и поволує Преглашенє.

Антифашизем би ознова мушел порушац питанє одкаль наисце приходзи фашизация и чи то ма вязи зоз такима стварами як фактична нєможлївосц же бисце уписали свойо дзецко до дежавних яшелькох/оводи, алє ше мушело куповац половни МиҐ. Або зоз тим же нєдавно принєшени lex specialis, з помоцу котрого войска и полиция добиє квартелї нє по ценох тарґовища; и то у капитализме. Або зоз тим же велька часц младих нє може мац закрице над главу анї по ценох тарґовища, анї нє по таких, прето же су нєзаняти, або робя на чарно. Або зоз мертвима роботнїками „Ґоши” о котрих зме тельо слухали, або зоз другима роботнїками о котрих зме вообще нїч нє чули.

Озбильне спроцивйованє фашизму можлїве лєм теди кед ше (ознова) враци економска и класна анализа (и нїґда нє прескочи анализа зоз „Масовней психолоґиї фашизму“). Кед ше уключи материялна стварносц зоз котрей вон рошнє як стоглава гидра, зоз койчого склєпана идеолоґия. Идеолоґия котра одвитує ирационалносци праве капиталистичней системи.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 129 раз, нєшка 1)