Так як треба, чи так як мож?

автор иван сабадош 13. фебруар 2017

Остатнї час даскельо вельки, стратеґийни теми, од хторих дзепоєдни порушани и на бокох „Руского слова”, прицагли вельку увагу рускей явносци. Чом ище нє маме руску националну библиотеку, музей, архив, ґалерию? Чи Младежски дом у Керестуре може ознова буц младежски? Кельо єст наших людзох у орґанох державней управи? Як зачувац друковани скарб у наших парохийох? Вшелїяк єст способи и можлївосци як систематично и по закону ришиц тоти питаня. Дзешка у швеце, Европи, держави и по општинох сиґурно єст фонди и конкурси по хторих би таки проєкти могло финансовац. Аж и кед ше винайдзе способ, и одкадз би то евентуално могло плациц, док ше ми попрезнаваме чи то по закону, чи сполнюєме критериюми и чи то мож так як зме надумали, гайзибан звичайно уж пойдзе. Так стратеґийни питаня оставаю нєришени, бо их анї нє мож ришиц лєм зоз „руского пенєжу”. Дзепоєдни ше преноша з ґенерациї на ґенерацию, „од приселєня” по нєшка. Дзепоєдни нови ше аж тераз отвераю, як зме рушели ґу Европи.

Национални совит Руснацох по важацей систематизациї нє ма правну службу. Нєобходни правни поради достава  од наших правнїкох у їх шлєбодни час и кед маю кеди, бо им еґзистенция индзей, лєбо их присподобює од других националних совитох хтори таки служби маю. Медзитим, ридко хтори модел применлїви на Руснацох. Други маю матични держави, єст их вельо, политично су моцни. Присподобиц їх модели ґу нашим обставином и потребом нє лєгко. Углавним, ридко кеди то благочасова и ефикасна правна помоц.

Тот, шлєбодно поведзено, сущни гендикеп рускей заєднїци пробоване надополнїц прейґ одбору-роботного цела-пододбору за управу и предписаня при Националним совиту. Медзитим, процес його формованя од початку ше замервел, ой иронийо, праве у предписаньох. Гоч нє треба занєдзбац анї принципиєлно розлични приступи – чи так як треба, та гоч и нїґда, чи так як мож, та гоч погришно, а анї особни антаґонизми медзи нашима лидерами, и то нє лєм у тим питаню. Так тераз цело за управу и предписаня у исти час и маме, и нє маме. Як славна Шрединґерова мачка. Нє знаш чи жиє, чи нє, док нє отвориш шкатулу. Сиґурне лєм же нє лапа миши.

(Опатрене 176 раз, нєшка 1)