Трибина о европскей престолнїци култури и Руснацох у Новим Садзе

автор мгк
765 Опатрене

НОВИ САД – Вельо ресурси и милиони еври у Новим Садзе буду уложени у наиходзацих рокох, и тоту нагоду би мали вихасноваци и Руснаци зоз свою Церкву и другима орґанизациями и институциями, же би представели и обновели свойо потенцияли – гварене на трибини „Европска престолнїца култури и Руснаци у Новим Садзе”, хтора 19. марца отримана у Церковней сали нашей грекокатолїцкей парохиї у Новим Садзе. Орґанизатор трибини була Културна рада новосадскей парохиї.

У уводним слове мастер менаджменту у култури и медийох Мирослав Кеважди здогадул же Нови Сад концом прешлого року преглашени за „Евопску престолнїцу култури 2021. року”, вєдно з городами Елефсини у Греческей и Темишвар у Румуниї. З тоту титулу городи маю задаток зачувац и промововац розличносц културох у Европи, як и заєднїцки вредносци при гражданох Европскей униї, а то допринєше и розвою городох, у складзе з їх стратеґиями.

Покраїнски секретарият за културу, явне информованє и одношеня з вирскима заєднїцами поволал заводи за културу же би до 21. марца придали предкладаня проєктох хтори змоцнюю институциї култури и участвованє у култури, а з тим у вязи поставене и питанє дзе у тих рамкох коло 2 000 Руснаци у Новим Садзе.

Кевежди мал зауваги на цалу процедуру „Европскей престолнїци култури” – же нєт досц конкретносци у стратеґиї културного розвою, же нєдосц консултовани национални совити националних меншинох, а питанє и чи то було и зоз Совитом за медзинационални одношеня Городу Нови Сад.

Попри тим, винєсол же слабосц стратеґиї и у тим же нє наведзени конкретни ришеня же хто, кеди и з хторима средствами будзе конкретно реализовац задумки. Нє познати анї критериї за додзельованє средствох, медзи културнима капацитетами нє препознати церковни обєкти, як нпр. парохийни будинки, цо окреме важне нашей церкви.

Як гварел Мирослав Кевежди, спрам представительох Городу би анґажовано вєдно мали наступиц Словаци, Мадяре и Руснаци зоз своїма идеями, а вєдно би мала робиц и наша церква, здруженя гражданох и представителє институцийох, окреме Националного совиту и Заводу за културу войводянских Руснацох. У цалим процесу значну увагу ше дава и културному туризму, та и ту треба вихасновац нагоду.

Присутни на трибини потримали таки видзеня, а на концу, з апелом на заєднїцке уключованє Руснацох до сучасних европских цекох, шицким подзековали Гелена Бабич у мено Културней ради и парох новосадски о. Юлиян Рац.

ПОВЯЗАНИ ТЕКСТИ