Три значни ювилеї

автор мартица тамашмартица тамаш 23. януар 2017

Новинско-видавательна установа „Руске слово” у тим, 2017. року, преслави три значни ювилеї: 70 роки Часописа за дзеци „Заградка”, 65 роки Часописа за литературу, културу и уметносц „Шветлосц” и 45 роки Часописа за младих МАК. Приблїжуюци ше ґу сторочнїци друкованого информованя на руским язику („Руски новини” 1924–1941, тижньовнїк „Руске слово” од 1945. року), можеме ше цешиц же маме сучасни друковани медиї по руски и же новини и часописи доступни читачом рижних возростох и интересованьох, збогацени и з електронску верзию, хтора ше находзи на веб-сайту Установи.

По наявох финансиєра новинско-видавательней дїялносци меншинских медийох у АПВ – Покраїнского секретарияту за културу, явне информованє и одношенє з вирскима заєднїцами, мешачни субвенциї у 2017. року за новини „Руске слово” и часописи „Заградка” и МАК буду як и прешлого року.

За видавательну дїялносц наявени лєпши обставини як влонї, кед зме на конкурсу обезпечели средства лєм за єдну кнїжку, та рахуєме же того року на конкурсох обезпечиме средства за друкованє дзешец кнїжкох и штирох числох часописа „Шветлосц”. Порядна финансийна помоц ґарантує стабилносц у роботи Установи, та припаднїком нашей рускей националней заєднїци зоз информативну и видавательну дїялносц оможлївюєме правочасну доступносц информацийох и литератури на власним, мацеринским язику и з тим розвиваме културу и язик, пестуєме традицию, чуваме национални идентитет.

Же национална свидомосц при нас, Руснацох, жива и моцна, и же нас як заєднїцу трима вєдно и у тих часох ґлобализациї и интензивних миґрацийох, видзели зме 14. януара у Бикичу и Шиду, на дзешатей по шоре Централней святочносци з нагоди Националного швета Руснацох у Сербиї. Преслава указала же Руснаци з Бикичу и Шиду чуваю и любя свой язик, свою виру, културу и традицию и же их у тим  потримує цала руска заєднїца.

(Опатрене 89 раз, нєшка 1)