Умар Юлиян Неваляни

автор дюп/ядю
1.5k Опатрене

КОЦУР – Пияток рано, 25. авґуста, у Коцуре, у своїм 59. року живота, умар Юлиян Неваляни, майстор фотоґрафиї и длугорочни член и активиста Рускей матки и Етно клуба „Одняте од забуца” у Коцуре.

Юлиян бул цихи, поцагнути чловек зоз велькима чувствами и потребами за уключованє до активносцох орґанизацийох хтори прицагли його увагу и хтори го поволали на його уключованє. Вше мал свойо безпоштредне думанє, лєм го ридко виношел, алє вше бул порихтани поробиц шицко по догварки, по правилох фаху, по димензийох, по напрямох, окреме у обласци сучасней фотоґрафиї.

Юлиян участвовал на шицких, або на векшини подїйох и збуваньох Рускей матки у Коцуре, Руским Керестуре и других местох у нашей жеми и иножемстве, у Польскей, Словацкей, Горватскей, дзе здруженє участвовало зоз програмами, або дзе участвовали його члени.

Фотоґрафовал шицко и шицких учашнїкох, мал око и руку за прави хвильки фотоґрафованя, та ше його фотоґрафиї часто находзели на рамикох глашнїка Рускей матки „Руснак”, як и дзепоєдних других виданьох на руским язику у нашей жеми и иножемстве.

Шицки, або вельку векшину фотоґрафийох зоз тих збуваньох, обявйовал на дружтвеней мрежи Фейсбук. Окрем подїйох и збуваньох чийо творителє були людзе, окреме го интересовали и природни зявеня и подїї, хтори тиж пробовал фотоґрафски зазначиц. И мал успиху и у тих активносцох, а медзи остатнїма, така подїя зазначена на дружтвеней мрежи Фейсбук 8. авґуста того року з меном „Бависко хмарох зоз шветлом”.

Розгварка зоз Юлияном, котру мож ту пречитац, вишла у 31. чишлє новинох „Руске слово” 3. авґуста того року.

Най будзе вична слава и памят Юлиянови Неваляному.

ПОВЯЗАНИ ТЕКСТИ