Уметносц и позитивна енерґия

автор Цецилия Надь
1.3k Опатрене

Наташа Боянович з Руского Керестура уж треци рок тренира интересантни танєц, а вон вимага креативносц, алє и физичну моц. У питаню денсгол (Dancehall) хтори походзи зоз Ямайки и од реґе музики, алє под вплївом диґитализациї, вон ма швидки ритем и додаванє вокалох. Денсгол ше почало правиц на компютеру, електронски. У тим тексту, упознаме вас зоз Наташу и тоту нєзвичайну файту танцу хтори вона танцує.

Танєц сам по себе єдинствени, провадзи приповедку худобних Ямайчанох, прето же вони зоз танцом виражую боль и нєдостаток за основнима потребами у живоце.

– Тот танєц нє мож поровнац зоз даєдним другим, та як цо у Америки познати гипгоп, так на Ямайки денсгол. То улїчни танєц на Ямайки, алє у Европи ше го танцує у сали, прави ше хореоґрафиї, знїма ше крочаї, и кладзе на Ютюб. Заш лєм, Ямайчанє найаутентичнєйши танцоше хтори ширя танєц – гвари Наташа.

Foto Sonja Mucenski_resize

Тренинґ подрозумює зогриванє, а потим ше роби хореоґрафиї, або рутини. Рутина то, у ствари, крочай хтори треба одробиц цали, односно до конца, сама хореоґрафия динамичнєйша, крочаї ше швидше зменюю и пререзую на половки. Наташа толкує и же постоя три файти денсголу – женски, хлопски и универзални. Женски денсгол можу танцовац лєм жени, док хлопски можу танцовац и жени и хлопи.

– Лєм жени танцую женски денсгол, прето же хлопи нє можу танцовац крочаї хтори женствени, сензуални, еротичнєйши. Жена уключує шицки часци цела, док хлопи, єдноставно, нє можу указовац одредзени атрибути. Женски денсгол виражує и указує женске цело и справованє, женску красоту, моцносц, а ґу тому прилагодзена и музика. Хлопски и универзални крочаї можу танцовац и жени и хлопи. Универзални стил подрозумює любовни писнї, хлопско-женски одношеня, а крочаї тиж так универзални, можу шицки танцовац, та аж и вєдно. Мнє особнє найинтересантнєйши женски стил, алє тиж так любим танцовац и хлопски денсгол, прето же ше мож вискакац, вируциц неґативну енерґию, и ту заступена дакус оштрейша музика. Вон сам по себе аґресивнєйши, наглашени улїчни стил и ґето – приповеда млада денсголерка.

Наташа гвари же тот танєц вимага флексибилносц и розрушаносц, а кед ше сце напредовац, треба тренирац кажди дзень. Єй вельке виволанє було направиц шпаґу, а то ше єй и поспишело.

ДОСЦИГНУЦ ТИТУЛУ ДЕНСГОЛ КРАЛЇЦИ

Наташа тренира денсгол у новосадским „Pointe Dance Serbia” студию. У нїм танцую шицки три файти денсголу, а у ґрупи их єст од 10 до 15 дзивчата. Гвари же єй з початку музика була нєзвичайна, специфична и нє могла ше на ню звикнуц, та направела паузу даскельо мешаци, алє вец тому танцу дала ище єдну шансу.

– Ознова сом ше приключела денсголу, алє сом ше преруцела ґу хлопскому инструкторови и зоз нїм зме робели лєм хлопски крочаї. Иншак, тот инструктор бул перши хтори почал тримац денсгол у Сербиї. Понеже сом була виключена зоз женского денсголу, и то ми ше нє пачело, упознала сом пар дзивки, и з нїма паралелно почала тренирац и хлопски, и женски денсгол. Тренирали зме дома, дознала сом вельо информациї и препатрела велї знїмки. Тераз нас превжала єдна нова инструкторка, хтора ше наисце трудзи коло нас на тренинґох – гвари Наташа.

20170118_190321_resize

У женским денсголу постої и dancehall queen, а то дзивка хтора може достац тоту титулу на даяким змаганю. Жири вибера хтора учашнїца найлєпше танцовала женски денсгол и вец вона достава титулу денсгол кралїци.

– Таки змаганя у Сербиї ище нє були, алє индзей у швеце ше орґанизує. Тиж так, орґанизує ше и роботнї денсголу хтори отримую Ямайчанє. Таке єдно збуванє отримане у Австриї и я на нїм була, а роботню отримала Кимико Версатиле зоз Ямайки. Там зме научели надосц нови крочаї, а робели зме и на динамичней хореоґрафиї. То цалком иншаке чувство и искуство кед уживо патриш и провадзиш як виводзи крочай дахто хто зоз Ямайки – гвари Наташа.

ПОДЗВИГУЄ САМОДОВИРИЄ И ЗАЦАГУЄ МУСКУЛИ

Циль денсголу знац цо вецей крочаї зоз хторих ше на концу оформи  танєц, точєйше уметносц. У Сербиї ше го нє танцує на улїци, як на Ямайки, алє фокус на гевтим другим боку, а то обдумовац хореоґрафиї и промововац их на дружтвених мрежох и платформох, як и орґанизовац журки, або наступац пред публику. Наташа гвари же уж даскельо раз наступала з денсголерами явно, а 2015. року танцовали на Еґзиту, на Латино стейджу.

– Кажди вечар зме наступали и мали зме вше иншаку хореоґрафию. Тиж так, я наступала и на Реґе стейджу дзе ше робел freestylе, цо значи же зме нє мали порихтани хореоґрафиї. То випатрало так же єдна дзивка направи крочай и вец гевти за ню повторюю, а танцовало ше женски, алє и хлопски денсгол. Наступали зме и у Футоґу, на мемориялу „Мирослав Батак Мичко”, а тот мемориял ше отримує роками и представяю ше модерни танци. Тиж так сом мала наступ и на новосадским штранду, на кошаркашским змаганю, а наступали зме на полчасу. Тото цо интересантне, орґанизую ше и денсгол журки, затераз у Беоґрадзе, а кед вельо людзе знаю денсгол на єдним месце, то уметносц и позитивна енерґия – приповеда Наташа.

Foto Sonja Mucenski 1_resize

Зоз тренираньом ше подзвигує самодовириє и полєпшує ше думанє о себе, односно о своїм випатрунку. Зоз танцом ше зацагує мускули, алє муша ше робиц и вежби зацагованя, хтори часто и часц самого зогриваня пред тренинґом.

Наташа тренинґи ускладзує и зоз студиями. Закончела основни студиї Анґлистики на Филозофским факултету у Новим Садзе, а предлужела и мастер студиї на истим напряму и факултету. Попри факултетских обовязкох, вона роби у єдней компаниї з Тайвану, у хторей Китайцом онлайн преподава анґлийски язик. Зоз тренинґами би любела и надалєй предлужиц, алє упущиц ше и до професийного танцу, а тиж так на даяки способ злучиц студиї и денсгол.

Фото: Цецилия Надь; Соня Мученски

ПОВЯЗАНИ ТЕКСТИ