Успишне стретнуце младих у Каритасу

автор злк
779 Опатрене

КОЦУР – У коцурским Каритасу всоботу, 6. мая отримане стретнуце младих з тему „Шлїди модерного часу – млади у борби зоз психичнима проблемами”.

На стретнуцу, хторе водзела психолоґ Соня Виславски з Руского Керестура, було коло трицец младих з Коцура, Руского Керестура и Равного Села, а медзи нїма и директор Каритасу нашого Апостолского еґзархату Янко Катона и координаторка Каритасу у Коцуре ш. Михаїла Воротняк.

11-Karitas-02

Психолоґ Соня Виславски младим бешедовала о диґиталней зависносци, зависносци од Фейсбуку, интернету, як и о хоротох як цо то депресия, стрес, анксиозносц и бес, хтори ше нєшка вше частейше зявюю при младих, а вони часто анї нє свидоми же маю проблем.

Стретнуце було интерактивне, та присутни робели тести и бавели бависка у хторих було и ґлуми, а же стретнуце було наисце добре обдумане и интересантне, указал и моцни аплауз хтори Соня од присутних достала на концу роботнї.

Шестра Михаїла Воротняк Виславсковей подаровала пригодни дарунок и младим наявела же шлїдуюце подобне стретнуце будзе о два мешаци, а будзе го водзиц психолоґ Ирина Шанта з Коцура.

11-Karitas-03

 

ПОВЯЗАНИ ТЕКСТИ