У Панелу младих и Йована Ноґавица з Керестура

автор маф
1.2k Опатрене

БЕОҐРАД – Школярка трецей класи руского оддзелєня Ґимназиї „Петро Кузмяк” з Руского Керестура Йована Ноґавица, на конкурсу вибрана до „Панелу младих” Поверителя за защиту ровноправносци Републики Сербиї и участвовала у першей часци обукох о феномену дискриминациї.

На тродньовей едукациї, од 21. по 23. май, члени „Панелу” прешли роботнї, преподаваня, презентациї и шведоченя на тему дискриминациї у шицких сферох живота, од полней, расней, вирскей, националней и каждей другей виключносци медзи людзми.

Члени „Панелу” маю задаток идеї толеранциї презентовац на дружтвених мрежох и у своїм штредку, а на єшень будзе и друга часц едукациї. Потим шлїдзи диґиталне умрежованє панелистох и їх активне участвованє у роботи Поверенїка з обласцох хтори ше одноша на дзеци и младих.

Йовану за Конкурс мотивовала педаґоґиня Школи Любица Няради, а вибрана є медзи 25 членох Панелу, хтори формовал Поверенїк за защиту ровноправносци у рамикох програми сотруднїцтва з Фондом Зєдинєних нацийох за дзеци (УНИЦЕФ) одн. його канцеларию у Беоґрадзе.

ПОВЯЗАНИ ТЕКСТИ