У дюрдьовским хотаре суша направела вельки чкоди

автор сас
947 Опатрене

ДЮРДЬОВ – Вельки горучави и нєдостаток влаги того року у дюрдьовским хотаре направели вельки проблеми польопривреднїком, бо польодїлски култури барз слабо напредовали и швидко ше сушели, так же кукурици дозрела коло мешац, та и скорей оптималного часу. Подобне було и зоз сою и слунечнїком, так же и їх урожаї були барз мали.

Ламачка и лупанє кукурици на полю у дюрдьовским хотаре почали ище концом авґуста, а урожай од єдней до тони и пол по ланцу, цо коло трираз менєй як прешлого року.

Дюрдьовчанє  кукурицу найчастейше предаваю на двох одкупних местох – до Землєдїлскей задруґи „Дьордє Зличич” и до Общей землєдїлскей задруґи „Чуроґ”.

– У нашей општини нє було дижджу и єдна є з найзагроженших, а подобни стан и у општинох Титель и Бечей. Чекаме одлуку ресорних покраїнских и державних орґанох и  прешвечени сом же даякей помоци парастом будзе – гварел член Општинскей ради Жабель задлужени за польопривреду Владимир Чонкич.

Министерство польопривреди, лєсарства и водопривреди явно обецало помоц найзагроженшим локалним самоуправом дзе урожаї страдали пре сушу, медзи нїма и Општини Жабель.

 

 

ПОВЯЗАНИ ТЕКСТИ