Християнє ше позберали коло своєй Мацери

автор мгк  фото вев
968 Опатрене

РУСКИ КЕРЕСТУР – Привитуюци вчера шицких присутних у Водици на означованю 200-рочнїци перших указаньох Мариї на тим месце, апостолски еґзарх за грекокатолїкох у Сербиї владика Георгий Джуджар гварел же зме ше зишли указац почитованє Мацери Божей за старанє, помоц и ласки.

– Сцеме пошведочиц свою виру, довириє и любов ґу нєй и модлїме ше за нас и за будуци поколєня – наглашел кир Георгий.

На вчерайшей шветочносци и Архиєрейскей Служби Божей у Водици наш еґзарх кир Георгий окреме привитал апостолского нунция у Републики Сербиї монс. Лучана Сурияния, архиепископа беоґрадского монс. Станислава Хочевара, владику зренянинского монс. Ладислава Немета, владику суботицкого монс. Яноша Пензеша, владику сримского монс. Дюру Ґашпаровича, крижевского владику кир Николу Кекича, владику скопского и апостолского еґзарха за грекокатолїкох у Македониї кир Киру Стоянова, ґенералних викарох, священїкох Римокатолїцкей церкви, священїкох и вирних з Крижевского вчадичества и з Македониї, грекокатолїцких священїкох з Мадярскей, наших священїкох и монахинї.

Тиж привитал и представительох Управи за сотруднїцтво з церквами и вирским заєднїцами Министерства правди Влади Сербиї, народну посланїцу у Скупштини Сербиї Олену Папуґа, представительох Националного совиту Руснацох, на чолє з його предсидательом Славком Рацом, представительох Националного совиту Українцох у Сербиї, представительох Општини Кула, на чолє з єй предсидательом Перицом Видеканїчом, представительох просвитних установох, шицких паломнїкох и слухачох Радио „Мариї”.

У Служби Божей архиепископ беоґрадски монс. Станислав Хочевар у своєй казанї обрацел увагу на змист читаня Євангелиї и Апостолу, наглашуюци же блажени жадни и гладни правди, бо ше насица.

– У Божей сили ше виражує Божа правда. Славиме 200 роки окремней присутносци Мариї, котра найбаржей потребовала Божу правду и вєдно з ню воскликуєме „Велїча душа моя Господа!”. Винчуєм тот ювилей, з поруку же бизме глїбше вошли до Божих и Марийових порученьох з Євангелиї – гварел монс. Хочевар.

Апостолски нунций Лучано Сурияни, як амбасадор Ватикану, гварел же є барз щешлїви же є у Водици и же шведочи повязованю з базилику Святей Мариї Маджоре (Велькей) у Риме.

– Кед ше християнє позбераю коло своєй Мацери, то вельке швето, а Мария нас сце прицагнуц ґу свойому Синови, ґу Богу. Кед ю будземе слухац, наша каждодньовосц ше претвори до дачого красшого и векшого – поручел вчера вирним у Водици нунций Сурияни.

ПОВЯЗАНИ ТЕКСТИ