Цени слунечнїку и сої ище нє познати, почала ламачка кукурици

автор мар
842 Опатрене

РУСКИ КЕРЕСТУР – У рускокерестурским хотаре прешлого тижня закончена тлачидба слунечнїку, а тлаченє сої будзе закончене того тижня. У хотаре уж почала и ламачка кукурици, за тераз лєм у чуткох, док лупанє кукурици на полю вироятно почнє наступного викенду.

Слунечнїк плацел солидно, вецей як прешлого року. Штреднї урожай тераз од 20 до 30 метери по гольту, а влонї бул од 20 до 25, понеже прешлого року слунечнїк бул поваляни. За тераз ище нє позната конєчна цена слунечнїку, а аконтна у Керестуре 36 динари за килограм. Прешлого року конєчна цена слунечнїку при одкупу була 33 динари.

У одношеню на прешли рок, урожай сої у керестурским хотаре преполовени, бо того року по гольту натлачени од скромних 8, до 20 метери по гольту у часцох хотара дзе було дижджу. Прешлорочни урожай сої бул од 25 до 30 метери по гольту, а предавало ше ю по 40 динари за кґ. Тераз аконтна цена од 45 до 50 динари, зависно од одкупного места.

Як ше указує, урожаї кукурици у керестурским хотаре того року буду барз розлични, зависно од квалитету жеми, часци хотара и количества паданьох.

За тераз ше кукурицу тлачи у чуткох, алє єст и такей хтору уж мож лупац, з влагу од 12 до 15 одсто. Влага лєпшей кукурици тераз од 19 до 23 одсто, та лупанє кукурици на полю вироятно почнє наступного викенду.

 

 

ПОВЯЗАНИ ТЕКСТИ