Чи задруґа зменша уплїв монопола?

автор мар
759 Опатрене

Пестуюци традицию, а зоз збогацованьом змистох котри прицагли числених иножемних, та и госцох зоз цалей Сербиї, орґанизована Туристично-привредно-културна манифестация „Днї керестурскей паприґи”, уж по шести раз. Як резултат активносцох Здруженя паприґарох „Капсикум анум” и його членох спомнута Манифестация удатно презентовала керестурски бренд – червену рогову паприґу, котру ше глєда од шицких векших пияцох, до хладзальньох за преробок на териториї Сербиї и споза єй гранїцох.

Паприґу ше пестує у валалє од давен давна, алє єй продукция вше интензивнєйша, та шлєбодно мож повесц же є тераз основна и примарна дїялносц у Керестуре. Паприґу садза и парасти, и школовани людзе заняти на рижних роботох.

Под час „Дньох керестурскей паприґи”, госци одкупйоваче були задовольни з квалитетом паприґи, цо єден з указательох же паприґу будзе кому предац. Но, нїхто нє понукнул векшу цену, та анї нє ґарантовали же останє така яка є тераз – коло 45 динари за першу класу.

Задруґа „Керестурска паприґа” у процесу снованя, а обчекованя од єй улоги на тарґовищу наисце вельки. Вона тота котра би прейґ сотруднїцтва з вецей велькима одкупйовачами мала розтерховац керестурски пияц. Кед Задруґа будзе робиц на хасен паприґарох, мож обчековац шлєбодни пласман, векшу цену и зменшани уплїв монопола вельких одкупйовачох, котри ше за истим столом догваряли о одкупней цени керестурского бренда.

ПОВЯЗАНИ ТЕКСТИ