Чи осмого дня настал рокенрол?

автор каролина папуґа 5. авґуст 2017

„Осми дзень” алтернативни бенд зоз Нового Саду котри всоботу, 29. юлия, наступел на журки котру на керестурским базену удатно орґанизовала нєпрофитна орґанизация „Пакт Он”. Нащивеносц була велька з оглядом на тото же  журка отримана у валалє. Могло  видзиц и старших и младших, та аж и родичох зоз дзецми, цо значи же людзе жадни таких случованьох, а як ше указує, жадни су и добрей музики. Сам бенд бул приємне нєсподзиванє, цо пре позитивну енерґию, цо пре сам репертоар котри порихтали. Приємне нєсподзиванє було и числене присуство младежи котри вєдно зоз бендом шпивали скоро кажду писню, а анї тоти кус старши ше нє придавали. Нажаль, таки журки ше нє отримую часто, та як єден од пошлїдкох то и тото же нєшка младеж ма иншаке одношенє ґу музики, за розлику од часох котри анї нє так давно за нами.

Музика ше нєшка масовно конзумує и критериюми квалитету скоро нїяки. Як резултат того то же нєквалитетне прейдзе як дацо добре и позитивне, а квалитет ше у тей маси вшелїячини анї нє препозна. То вообще нє муши значиц же нєт младих котри нє роздумую зоз свою главу и нє пробую креировац свой смак, свойо видзенє ситуациї. Понеже нєшкайша младеж преполнєта зоз вшелїяку музику, велї ше давя у тим морю койчого. Як наисце приємне нєсподзиванє на соботовей журки були праве тоти млади котри препознавали скоро кажду писню котру тот бенд одграл, з оглядом на тото же репертоар бул досц рижнородни, та ище и зоз часох пред  дачиїм народзеньом. Точно могло розликовац хто там лєм прето же би бул там, а хто прето же люби таку музику и ужива у наступу. Бенд дал максимум од себе, грали вецей як два годзини и за похвалу їх витирвалосц. Сам бенд потримує младих котри ше намагаю роздумовац зоз свою главу и витвориц свой власни идентитет у морю шунду и кичу, озда прето же и сами прешли през тоти фази и твардо ше тримаю своєй одлуки же буду грац тото цо ше им пачи и же затримаю власни печац. Верим же у Сербиї исную велї бенди котри граю квалитетну музику, алє нє маю векшу потримовку дружтва, та анї медийох, а без того ше чежше афирмую. Шицко то державна стратеґия и ище вше ше верциме у колє “Хлєба и танцу” Народу дац найбаналнєйшу музику котра зна пребудзиц найбаналнєйши емоциї и заглупи народ и автоматски ше будзе лєгчейше управяц зоз истим. Певальки уж досц длуго водза сцену дзе од квалитету нєт анї „к”, Голи задки и голи предки тото цо вони понукаю и ширши маси ше на тим воспитую и на тим одрастаю, а то ноши други пошлїдки. Вельо завиши и од домашнього воспитаня, од схопносци препознац квалитет, способносци розвиваня смаку, алє и од самого околїска зоз котрим зме окружени.

Понеже обставини таки яки су, шицким алтернативним бендом нє преостава нїч друге лєм предлужиц зоз борбу и намаганьом  же би ше нє придали и нє одустали од свойого цилю. Таки бенди потребни дружтву гоч лєм пре даяки баланс у глави кед нє пре инше. И треба же би були витирвали, прето же, як и вшадзи, так и у нашим куколю єст житка.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 191 раз, нєшка 1)