Шампионска екипа сезони 1966/67. року

автор апал 26. фебруар 2017

Пияток, 17. фебруара, премиєрно приказани филм „Леґенди о леґенди” автора Мирослава Виславского, o блїщацей ґенерациї фодбалерох, хтора далєкого 1966/67. року посцигла найлєпши резултат у историї Клуба. Перши раз ФК „Войводина” була национални шампион и дошли по штварцину финалних змаганьох у Купу европских шампионох. Прешлого року бул означени ювилей – 50 роки од того велького успиху.

У полней сали амфитетру у Спортским и дїловним центру у Новим Садзе, на премиєри присуствовали автор филма, шицки фодбалере и члени Управи Клуба хтори ище медзи нами, а були заслужни за тот позарядови успих. Медзи нїма були: Радомир Крстич, Александар Ивош, Васа Пушибрк, Радивой Радосав, Йован Деянович, Душан Миїч, як и числени вельки любителє и навияче ФК „Войводина”.

Филм, хтори на тот завод вецей як вредни документ, почал зоз здогадованьом на днї кед Клуб оформени – яр 1914. року. През шведоцтва и богату архиву дошло ше праве по 1966. рок, кед оформена шампионска екипа.

Було то праве емотивне дожице шицким присутним на премиєри филма, бо цекол през приповедку хтори на хвильку ожили давни часи.

Автор филма, Виславски, пред приказованьом наглашел же идея за филм настала давно. Реализация ушлїдзела кед ше назберало досц материялу.

– Пред тим сом робел вецей подобни проєкти хтори приказовани у форми серийох и документарних филмох. Главни мотив то факт же слово о ґенерациї хтора, вшелїяк же мала причини буц преславена. Насампредз прето, же посцигла резултат яки чежко же ше ище дакеди повтори. Клуб освоєл националну шампионску титулу и пласовал ше на Куп европских шампионох, змаганє  на хторим участвовали осем найлєпши екипи на Старим континенту. Роками сом зберал архиву за филм, а то шведоченя фодбалерох хтори були у тей славней ґенерациї. Кед ше конєчно здобули условия, направели зме филм хтори тирва 75 минути. По моїм думаню драгоцини є, насампредз же филмски илуструє кнїжки хтори написани на тоту тему – гварел автор Мирослав Виславски.

legende 1

НЄПОВТОРЛЇВИ УСПИХ

Теди, пред 50 роками, ФК „Войводина” одбавела 30 змаганя у нациналним першенстве. Победзела на седемнац змаганьох, дзевец були нєришени, а лєм штири страцела. Бавяче посцигли 43 ґоли, а прияли 28 цо творело позитивну ґол-розлику од 15 ґоли. Освоєли 43 боди, були перши на таблїчки, а друга була екипа заґребского ФК „Динамо” хтори мали 35 боди, кельо мал и ФК „Вележ” на трецим месце. Страцели змаганя од ФК „Риєка” (3:1), ФК „Червеней гвизда” (2:1), ФК „Сараєво” (2:1) и ФК „Вардар” (2:0). На змаганьох посцигли вецей як єден ґол, просеково.

У Куп змаганьох фодбалере посцигли фантастични успих. Перше елиминовали ФК „Адмира” зоз Бечу. Потим, тото чому ше нїхто нє наздавал, победзели фаворизовани ФК „Атлетико” зоз Мадриду. За Атлетико теди бавели: Соса, Уртияґа, Уфарте… Тренер екипи бул Ото Ґлория.

Нє мали щесца у змаганю зоз ФК „Селтик” зоз Ґлазґова хтори виборел титулу шампиона Европи и швета. У составе тедишнєй екипи були; Мекнил, Янґ, Ленокс, Мекбрайд, Волис…, а тренер бул Джок Стайн.  Но, заш лєм, то за Войводину бул вельки, шампионски успих.

Интересантни и полни з емоциями були здогадованя фодбалерох, а хтори заслужни за тот успих. Так повесц, шицки, а хтори нєшка ище медзи нами, маю вецей як седемдзешат роки, алє їх приповедка, и здогадованє на тоти давни часи, живи. На хвильку, здобува ше упечаток же праве тераз вишли зоз терену до фодбалскей зоблєкальнї. Лєбо, таки, же би заш могли побегнуц за лабду на терену и досягнуц ище векшу славу. На ґолу Войводини теди бул славни Илия Пантелич, а зоз тих шицких змаганьох останє запаметани по бравурозней одбарни ґола Войводини. Так повесц, шицки лабди хтори прешли шеснац метери, були його. Процивнїцки бавяче нє могли найсц прави поцаг же би го спреведли и лабду послали до ґола хтори бранєл.

ВЕДЕТА ТАКАЧ

Стандардни першотимец тей шампионскей ґенерациї бул Силвестер Такач. У спомнутей змагательней сезони на трицец змаганьох у националним першенстве Такач дал 13 ґоли, а у куп змаганьох Европского шампионату штири. Окреме добре бавел у змаганю зоз Мадридским Атлетиком кед победзела Войводина дзекуюци ґолом хтори вон дал.

Праве пред  змаганьом зоз Селтиком, прешол бавиц до екипи ФК „Рен” зоз Францускей. Од достатого пенєжу зоз того трансферу, стадион у Новим Садзе достал рефлектори. Алє, нажаль, його нєдостаток, цо велї потвердзели, у змаганю зоз Селтиком ше почувствовал у бависку Войводини. Можебуц же би резултат того змаганя бул иншаки кед би вон остал у тиму, а можебуц  же би Войводина давного 1967. року була и шампион Купу.

Як добри фодбалер, потим ше потвердзел и у других иножемних клубох. Бавел у екипи Стандарду зоз Лиєжу (Белґия) хтора, док вон бавел, два раз була национални шампион и финалиста европского Купу. Добре ше указал и як тренер численим екипом у Нємецкей, Французкей, Белґиї, потим и у Мароку и Саудийскей Арабиї. Зоз екипу Келна бул побиднїк Купа Нємецкей, у Французкей, як тренер, бул зоз свою екипу два раз финалиста националного купа, шампион Марока, а зоз екипу ФК „Ница” освоєл Куп Французкей, а шампионски погар му уручел тедишнї предсидатель Жак Ширак.

Важне надпомнуц же Силвестер Такач, по походзеню Дюрдьовчань, за сениорску екипу Войводини одбавел 426 змаганя на хторих дал 245 ґоли. На каждим змаганю, просеково дал вецей як єден ґол. Бавел за нашу екипу репрезентациї 15 змаганя на хторих дал два ґоли. Бул и у екипи репрезентациї на Олимпийских бавискох у Риме 1960. року, дзе освоєл златну медалю, а потим и у Япопнє 1964. року.

Нажаль, з тей нагоди Силвестер Такач нє могол присц на премиєру филма „Леґенди о леґенди”, о шампионскей екипи у хторей и вон бавел. Послал писмо у хторим повинчовал авторови Виславскови, а и вон ше здогаднул на тоти давни и блїщаци часи нашого фодбалу.

legende 4

ВЕЦЕЙ ОД ФОДБАЛУ

Филм Мирослава Виславского, окрем документарней вредносци патрачом понука ище вельо. Насампредз, то шведоченє полне з емоциями хторе шведочи о єдним часу кед фодбал бул вецей од бависка. Зоз вельо шарму здогадує на романтични часи пред пейдзешат роками, кед ше фодбал бавело дзеведзешат минути, кед нє було страцени змаганя аж по хвильку кед судия нє означи конєц. То причта о златней ґенерациї фодбалерох хтори у каждим поглядзе можу буц за приклада и як спортисти и як людзе. Прето, филм достава прикмету и воспитного, бо шицким будуцим младим фодбалским талантом може ошвициц тот спорт з другого боку.

– То бул час велькей конкуренциї. Бавяче приходзели зоз числених малих клубох. Числени з нїх пришли и на премиєру филма. Найважнєйше же би ше наш модел хтори нас приведол по тот вельки успих, а то робота, шор и дисциплина, пренєсли на младих хтори нєшка бавя у нашей Войводини. Тот филм, вшелїяк, младим може буц драгоказ – гварел Васа Пушибрк, член златней екипи Войводини.

У твореню филма помогли Управа за културу городу Нови Сад и числени приятелє и любителє „Воши”. Ширшей явносци, як наявене, филм будзе емитовани и на програми Радио телевизиї Войводина у трох предлуженьох.

ВОЙВОДИНА У КУП УЕФА

Сезону за паметанє далєкого 1966/67. року екипа ФК „Войводина” закончела зоз позарядовим успихом у змаганьох Купа УЕФА. Нєшка то Лиґа Европи. По штварцину финалних змаганьох победзели ФК „Адмира” зоз Бечу 1:0, а реванш бавели без ґолох, 0:0. Зоз мадридским Атлетиком у Новим Садзе победзели 3:1, потим у реваншу страцели зоз 2:0, а у трецим одлучуюцим змаганю ознова победзели зоз 3:2. Так сцигли по штварцину финала. На своїм терену победзели Селтик зоз 1:0, алє на реваншу у Ґлазґову страцели зоз 2:0.

Селтик потим победзел екипу ФК „Дукла” зоз Чехословацкей зоз 3:1, а у финалним змаганю победзели и екипу ФК „Интернационале” зоз Италиї.

ВОША „ДРИМ ТИМ”

У шампионскей екипи бавели: Илия Пантелич (30 змаганя), Бранислав Велькович (1), Жарко Николич (29), Стеван Секереш (29), Ивица Брзич (29), Младен Вучинич (26), Стеван Нештицки (17), Димитриє Радович (16), Тонче Стамевски (3), Райко Алексич (2), Силвестер Такач (30), Васа Пушибрк (30), Владимир Савич (29), Добривоє Тривич (28), Дьордє Павлич (18), Радивой Радосав (12), Адолф Ламби (8), Велько Алексич (4), Драґан Сурдучки (1) и Андєлко Маринкович (1). Тренер екипи бул леґендарни Бранко Станкович.

(Опатрене 177 раз, нєшка 1)