Ютре у Керестуре акция чисценя базену

автор мар
693 Опатрене

РУСКИ КЕРЕСТУР – На рускокерестурским базену ютре, 15. юния, будзе отримана роботна акция котру орґанизує Месни одбор Сербскей напредней странки (СНС) у Руским Керестуре.

Як дознаваме од предсидателя Месного одбору СНС Иґора Фейдия, то єдна зоз векших и значнєйших роботних акцийох, на котрей першенствено заплановане очисциц базен и пририхтац го за наиходзацу сезону купаня.

– Попри тим, плануєме офарбиц циви, покошиц траву доокола, на лавочкох котри пред даскельо роками там преселєни зоз центру валала будземе меняц дещички, а пооправяме и древени столи и лавки котри погубели вандали. Обезпечели зме и материял за ище три нови комплети лавкох и столох, котри плануєме направиц у наиходзацим чаше – гвари Фейди.

У роботней акциї буду участвовац школяре седмей и осмей класи основней школи, Здруженє спортских рибарох „Коляк”, члени Конїцкого клубу „Русин”, члени Церковного одбору, члени Добродзечного огньогасного дружтва Руски Керестур, як и члени општинского одбору Сербскей напредней странки зоз местох општини Кула.

Роботна акция почнє рано од 9 годзин, а можу присц и шицки други заинтересовани Керестурци котри дзечни помогнуц.

ПОВЯЗАНИ ТЕКСТИ