Активносц завиши од школярох

автор М. АФИЧ/О. ПЛАНЧАК-САКАЧ 6. децембер 2015

Школярски парламент ше вибера на єден рок, ма предсидателя, заменїка и секретара, ма свой дїловнїк, у септембру приноши свой план роботи зоз хторим ше провадзи интересованя школярох, а парламент тиж и єдно цело хторе провадзи роботу самей Школи. У керестурскей Школи парламенти активни уж 12 роки.

У роботи Основней и штреднєй школи „Петро Кузмяк” з Руского Керестура, замерковали зме же ше велї активносци витворює на инициятиву Школярских парламентох. О тей теми бешедовали зме з їх координаторками, педаґоґинями Марию Шанта и Любицу Няради. Як гваря педаґоґинї, гоч им то нє и роботна обовязка, подрозумює ше же би школяром помогли пренайсц и витвориц їх одредзени интересованя.

ПАРЛАМЕНТ ОШ НАЙАКТИВНЄЙШИ У ТИЖНЮ ДЗЕЦКА

 Як гвари Шантова, у Основней школи до Школярского парламенту уключени школяре лєм седмей и осмей класи, бо то так по закону, та школяре пиятих и шестих класох нє маю на тото право, гоч випатра же и вони заинтересовани за таку активносц. Членох парламенту ше вибера зоз каждого оддзелєня по двойо, вибераю их школяре и то тих цо су заинтересовани за таку активносц, и сцу зоз своїма идеями допринєсц свойому окруженю.

– За роботу Парламента ми маме начални план, алє го кажди рок кориґуєме на основи интересованя школярох, хтори ше углавним меняю. Так зме єден рок, кед школяре були ориєнтовани ґу рисованю, орґанизовали Подобову колонию дзе зме волали и школярох з наших местох, тиж зме орґанизовали и рижни вистави и подобне.  Значи, мож повесц же активносци Парламента завиша од прихильносцох школярох. Тиж, наш парламент нє таки активни як штредньошколски, бо вони заш лєм старши школяре и дозретши особи – толкує педаґоґиня Шантова.

Internat-Tamara Hrin 005

Як дознаваме, през тоти роки Парламент Основней школи порушовал числени активносци у рижних обласцох, од спортских змаганьох, прейґ рижних квизох, едукацийох на теми хтори нє заступени у настави, та и еколоґийни акциї.

– Найвецей идеї школяре реализую у Тижню дзецка, за Дзень залюбених и подобне. Кажди рок орґанизуєме гуманитарни акциї прейґ хторих помагаме рижним Здруженьом инвалидох у нашей општини и округу, и у нашим валалє и школи. Намагаме ше бешедовац зоз школярами о наших руских виданьох. Кед зме мали виборни предмет нашу руску традицию и ту зме повязовали рижни теми и едукациї. Було и преподаванє о походзеню руских презвискох, праве на инициятиву школярох, потим виставу старих руских кнїжкох, а того року и представянє младежского часопису МАК. Тиж зме мали и вельо еколоґийни акциї и зберанє паперу, пластичних фляшкох и едукациї з тей обласци. Часто зме на змаганьох уключовали и госцох з других руских и сербских школох. Дакеди школярох треба лєм дакус поґурац же би вони з одушевийом витворели свойо идеї – заключує Шантова.

ШТРЕДНЬОШКОЛЦИ УКЛЮЧЕНИ ДО УНИЇ ШТРЕДНЬОШКОЛЦОХ СЕРБИЇ

Парламент штредньошколцох керестурскей школи тиж так активни. О тим нам бешедовала координаторка педаґоґиня Любица Нярадийова.

– У нашей Школи Парламент роби од 2004. року,  а кельо є активни, завиши од ґенерациї. Дакеди ше зложи така ґрупа же су наисце креативни, маю идеї, заинтересовани су за свойо права и за можлївосц же би свойо интересованя понукли и другим и же би то було на уровню Школи, а у тим целу маю можлївосц же би вплївовали и на сам цек и роботу Школи. Кед сом прировновала число отриманих схадзкох у школским року, видно же у 2004/5.  отримани 4, у 2006/7 – 10,  у 2007/8 – 6 схадзки, а 2011/12 мали зме аж 13 схадзки, бо то була активна ґенерация. И того року думам же буду активни, маю задумки, знаю цо сцу и будзе роботи – гвари Нярадийова.

Skola-robota parlamentoh 007

Же би ше Парламент уключел до Униї штредньошколцох Сербиї, дзе участвовали у даскелїх проєктох, тото покончела Нярадийова, а  иницирала и же би ше повязали и сотрудзовали и школярски парламенти на уровню Општини Кула. Шицко тото доприноши промоциї и керестурскей Школи и єй школярох.

– Мушим визначиц же уж вецей роки як Парламент порушал добродзечнє даванє креви за матурантох, цо барз успишне и кажди рок єст вше вецей давательох, а ту сотрудзуєме и зоз Червеним крижом хтори отримує мотивацийни роботнї. Визначела бим и гуманитарну акцию „Єдна винчованка – єден ошмих” хтора тиж пестує и креативносц и гуманосц школярох, потим представянє дакедишнїх наших школярох през їх активносци, маме и велї едукативни роботнї на теми хтори актуални за одрастанє младих як насилство, хороти зависносци и подобне. Патрим же би тоти едукациї були рижнородни, бо им треба дац цо вецей можлївосци у хторих би ше пренашли и най видза же можу буц успишни, лєм треба робиц – заключує Нярадийова.

ШКОЛЯРЕ ЗАДОВОЛЬНИ

Skola-parlamenti-Andrej 003О роботи у Парламентох позитивни слова мали и їх терашнї предсидателє, Андрей Надь школяр осмей класи и Соня Кнежевич матурантка ґимназиї. Обидвойо похвалєли нагоду же школяре можу витвориц свойо идеї хтори хасновити и цалей школи, або и ширше. Кнежевичова барз задовольна и з участвованьом на сходзе Униї штредньошколцох у Беоґрадзе. Як наглашела и школяре задовольни же можу дацо поробиц, а найновша вистка же порушали потримовку прейґ петициї „Алексовому закону” хтори вязани за насилство медзи школярами.

Skola-robota parlamentoh 009

ПРАВА ШКОЛЯРСКИХ ПАРЛАМЕНТОХ

Зоз законом о роботи Школярских парламентох, школяре маю право виберац своїх представнїкох до Школского одбору, участвовац у роботи рижних тимох хтори робя на уровню школи, маю право дац свойо думанє и предложиц даяки активносци цо ше дотика школских документох, од рочней програми роботи, школского плану, розвойного плану школи, вшадзи у тимох заступени и школяре, а їх представнїкох ше вибера на школярским парламенту.

 

 

(Опатрене 144 раз, нєшка 1)