Безплатне путованє − награда, алє и сатисфакция

автор С. Барань 13. децембер 2015

Найлєпши студенти Општини Жабель и того року наградзени зоз безплатним путованьом и нащиву єдного од красших городох у Европи.

Дзекуюци добрим оценом на студийох и тому же жию у општини котра наградзує закладаня младих, котри, як предсидатель општини Жабель Чедомир Божич гварел − єй будучносц, найлєпши студенти наградзени зоз нащиву Праги, главного городу Ческей. Таки путованя поставаю традиция котру студенти оценюю зоз найвисшу оцену.

З општини вибрани дзеведзешат найлєпши студенти, а медзи нїма и дванацецеро Дюрдьовчанє. На конкурс ше могли приявиц студенти до 26 рокох на основних, дипломских и специялистичних, а до 27 рокох на докторских студийох, котри у жабельскей општини найменєй пейц роки и у прешлим школским року им штредня оцена була найменєй 8. Пре обовязки на факултету, на драгу, 26, новембра, рушели шейдзешат штверо студенти. Општина им обезпечела превоз, осиґуранє, два ноци у готелу зоз двома фриштиками и вечерами и водзача котри им указал Прагу.

З Дюрдьова медзи вибранима найлєпшима судентами були и − Сладяна Дудаш, студентка Природно-математичного факултету Новим Садзе, Кристина Малїк, Кристина Маркович, Милица Михелц и Дария Сазданич, студентки Медицинского факултету у Новим Садзе, Теодора Ґолубович, студентка Високей школи за образованє воспитачох у Кикинди, Светлана Ґнип и Йована Боїч, студентки Филозофского факултету у Новим Садзе и Арсениє Карпич, студент Факултета технїчних наукох у Новим Садзе. З Ґосподїнцох наградзени штверо студенти, зоз Жаблю 27, а зоз Чуроґу 21 студент.

Иван Ґубаш, Природно-математични факултет, Нови Сад:

− Першираз сом наградзени з путованьом, бо сом студент другого року и першираз сом мал нагоду конкуровац. Барз ми одвитовало, бо сом ше одпочинул од ученя и обовязкох. Дакус сом пременєл штредок, а чежко же бим ше сам, або з дружтвом могол так орґанизовац и одпутовац. Дестинация и орґанизация були одлични. Прага прекрасна и любел бим там пойсц ознова. Найвекши упечаток на мнє охабела Вавилонска годзина. Любим астролоґию, та кед сом видзел годзину котра так добре зачувана виками, бул сом барз нєсподзивани.

Иван на твердинї Вишеґрад

Иван на твердинї Вишеґрад

Мария Хромиш, Висока школа за образованє воспитачох, Нови Сад:

− Дзекуюци конкурсу за студентох, прешлого року сом путовала до Бечу, а того року до Праги. Таки путованя права сатисфакция за студентох, бо верим же би ше векшина з нас котри маме обовязки на факултету сами нє орґанизовали и одпутовали даґдзе одпочинуц ше и „склонїц” думки з ученя. Прага прекрасна и жаль ми же ше векшина студентох на тим путованю одлучела за одход до шопинґу, а нє за лєпше упознаванє городу. Центер барз вельки и интересантни. На Влтави, котра преходзи през Прагу, єст вельо красни мости. На мнє найвекши упечаток охабел Карлов мост и Вавилонска годзина.

Мария и Тамара (з лїва на право) у центре Праги

Мария и Тамара (з лїва на право) у центре Праги

Тамара Сеґеди, Природно-математични факултет, Нови Сад:

− Барз ми ше пачи же сом мала нагоду упознац тот прекрасни город. На путованю зме ше крашнє дружели зоз шицкима студентами зоз нашей општини. На таки способ нас мотивую же бизме були успишни на студийох и же бизме ше и надалєй намагали. Прешлого року сом ишла и до Бечу. Предсидатель општини нам гварел же бизме требали предложиц город котри бизме любели нащивиц нарок. Любела бим пойсц до Риму. Найвекши упечаток на мнє охабел Карлов мост котри символ Праги. Барз є специфични и на нїм єст вельо статуи. На драги до Праги нащивели зме Братиславу, а кед зме ишли дому, и твердиню Вишеград, з котрей видно прексрасну панораму Праги.

(Опатрене 81 раз, нєшка 1)