Будую канализацию, а у плану и винотека

автор Вл. Дїтко 11. фебруар 2016

Прешлого року закончена друга фаза вибудови канализациї у Шидскей улїци и Солунских добровольцох, того року ше роботи предлужа, а плановане и асфалтовац Партизанску, Сримску и Планинску улїцу.

Без огляду на економску кризу у Беркасове досц зробене же би ше комунално ушорело валал хтори ма коло 1 400 жительох. На концу 2015. року закончена друга фаза вибудови канализациї длужини коло километер у Шидскей улїци (нєпарни числа) и Солунских добровольцох, а инвестиция виноши вецей як пейц милиони динари. Джон Файфрич, предсидатель и Зоран Видович, член Совиту Месней заєднїци Беркасово напоминаю же у 2014. року почала вибудов першей фази канализацийней мрежи, длужини 300 метери, на хтору ше по конєц 2015. року прикапчало коло 20 обисца. Средства обезпечени зоз буджету општини Шид и АП Войводина доложела ище 3,7 милиони динари.

SID RADOVI NA IZGRADNJI KANALIZACIJE U BERKASOVUСредства на подобни способ обезпечени и кед слово о финансованю другей фази на хтору ше ма прикапчац коло 60 обисца.

– Плануєме предлужиц вибудов канализациї и у 2016. року. Слово о роботох тиж у Шидскей улїци алє на парним боку, по окруцину. И тоти роботи би мали коштац коло 3,7 милиони динари. Тиж плануєме асфалтовац Партизанску, Сримску и Планинску улїцу, як и каплїчку на православним теметове – толкує Файфрич и Видович.

Нашо собешеднїки додаваю же Беркаксово познате по винїцох и добрих винох и же єден з планох и розвой туризма. У центре валала уж роками „стирча” фундаменти будинку хтори нїґда нє збудовани, а на тим месце би требала буц винотека. Проєкт кошта коло 15 милиони динари и треба обезпечиц жридла финансованя. У винотеки би стаємно були виложени вина, хтори би туристи могли коштовац и куповац и на тот способ би хасен мали и винїцаре, и валал пре розвой туризма.

(Опатрене 69 раз, нєшка 1)