Вербас достал городски музей

автор А. МАРКОВИЧ/О. ПЛАНЧАК-САКАЧ 9. фебруар 2016

Дотерашня Музейна збирка у Вербаше на схадзки Скупштини општини Вербас, хтора отримана 17. новембра прешлого року, з вименками и дополнєнями сновательного акту Културного центру, достала статус Городского музею Город пошвидко достанє стаємну музейну постановку, хтора презентує историю Вербасу од насельованя перших людзох на тоти простори. Городски музей учишлєни до мрежи музейох Сербиї, а у орґанизацийним смислу є часц Културного центру Вербас. Як визначела руководителька Городского музею Весна Ґрґурович, финални пририхтованя за пременку статуса почали у априлу прешлого року.

DSCF1911– Теди нам бул фахови надпатрунок з нашей матичней установи – Музею Войводини. Достали зме инструкциї цо окончиц, мушели зме формално правно ушориц Музейну збирку, бо зме праве так були сновани и реґистровани у Новим Садзе и Беоґрадзе. Далєй зме дефиновали музейни простор, почали роботи на формованю стаємней постановки, и першираз пописали шицко цо музей ма. Тиж так, дефиновали зме штири збирки: история, археолоґия, подобова уметносц и етнолоґия, а шицки вони ше одноша на историю Вербасу – визначела, односно резимировала активносци Весна Ґрґурович.

ИСТОРИЙНА ПРИПОВЕДКА О ВЕРБАШЕ

По єй словох, шицки предмети пописани, спаковани до шкатулох и зложени у депо просторе. Окрем того, дефиновани простор за канцелариї, за депо, за лабораторию и простор за стаємни и тематски вистави.

У стаємней постановки будзе презентована приповедка о Вербаше, од перших шлїдох чловека на тим просторе, та по конєц штреднього вику.

– Ту буду предмети зоз збирки археолоґиї и збирки историї. У простору за тематски вистави будзе ше меняц постановки, а у чаше кед нєт тематски вистави, явносци буду доступни дїла маляра Йожефа Пехана. То часц збирки подобовей уметносци, док збирка етнолоґия, по планох, будзе поставена у бази „Центар” у Старим Вербаше дзе маме етно хижу. У бази „Центар” представени и период историї Вербасу под час Другей шветовей войни и ошлєбодзеня – визначел кустос историчар Павле Орбович и додал же у рамикох Музею окремне место ма и апатика Милети Лесковца, хтора зачувана.

Апатика Милети Лесковца

Апатика Милети Лесковца

 У МУЗЕЮ БУДУ ЗАСТУПЕНИ И РУСНАЦИ

– У рамикох историйней часци, будземе ше занїмац зоз шицкима народами хтори жили и хтори жию на тих просторох, конкретно през релиґию, так же ше пошвециме шицким вирским заєднїцом и храмом. У тим смислу ту будзе и приповедка о грекокатолїцкей парохиї, насельованю Руснацох и їх живоце на тих просторох. Так исто будзе за шицки други национални и вирски заєднїци – визначел Орбович.

Pavle OrbovicДруги кустос историчар Боро Воїнович додал же у рамикох централного будинку Городского музею, єдна простория будзе наменєна за програми вязани за етнолоґию.

У  Музею тераз заняти троме кустоси, двоме историчаре и єден археолоґ, як и технїчар-документариста. Хибя кустос-етнолоґ и кустос за подобову збирку, алє предвидзене же тоти особи буду анґажовани по потреби.

– Формованє стаємней постановки процес, и важне же зме вошли до ньго. Найважнєйше же бизме витворели можлївосц прияц нащивительох, окреме школярох, бо ше так формує будуцу публику, зоз звикованьом на простор и на змисти. Стаємна постановка будзе присподобена ґу новим потребом и трендом музеолоґийней дїялносци, окреме за роботу з дзецми, же би простор зажил – заключела Ґрґуровичова.

УСТАНОВА У СЛУЖБИ ДРУЖТВА И ЙОГО РОЗВОЮ

– По ИКОМ-овей дефинициї, музей нєпрофитна, стаємна установа у служби дружтва и його розвою, отворена за явносц, хтора зазберує, конзервує, виглєдує, комуникує и презентує материялне и нєматериялне нашлїдство чловека и його околїска, за потреби едукациї, виглєдованя и забави. То мисия хтору и ми мушиме сполнїц – визначела руководителька Музею Весна Ґрґурович.

БОГАТЕ НАШЛЇДСТВО

– Городски музей у Вербаше формовани з богатим нашлїдством. Нє зменшуюци заслуги поєдинцох и институциї, поставена лєм одлична основа. Знанє и искуство хторе музеї чуваю, зоз сучасним приступом, вихасновац як предносц. Добра вистка же присутна одлична свидомосц же Музей у Вербаше свою мисию институциї у култури просвитительски щиро пилнує – гварел музейни совитнїк археолоґ Небойша Станоєв, коавтор першей стаємней постановки Музейней збирки Културного центру Вербас и длугорочни руководитель археолоґийних виглєдованьох на Шуваковим салашу.

muzejni depo

(Опатрене 81 раз, нєшка 1)