Представителє Туристичного здруженя Руски Керестур, 22. авґуста ше вєдно з другима членами Кластеру „Истар 21” представели на штанду АП Войводини на Медзинародним польопривредним и поживовим сайме „Аґра” у Ґорнєй Радґони у Словениї. Наступ на сайме оможлївел Покраїнски секретарият за привреду и туризем.
Саям у Ґорнєй Радґони, при самей австрийскей гранїци, хтори отримани од 20. по 25. авґуст, ма длугу традицию и єден є з водзацих саймох польопривредних продуктох и поживи у тей часци Европи. Уж ювилейни 10 роки на нїм участвує и АП Войводина, хтора прейґ свойого Секретарияту за привреду и туризем потримує проєкт „Богатство розличносцох”. Проєкт реализує Кластер „Истар21” хтори ма членох зоз шицких крайох Покраїни, и здруженя и туристични орґанизациї скоро шицких националних заєднїцох цо жию у Войводини. Рижнородне понукнуце продуктох з ознаку „Найлєпше з Войводини” и ознаку ґеоґрафского походзеня збогацели презентованє польопривредно-привредних и туристичних потенциялох Войводини на штанду Покраїни. Пондзелок, 22. авґуста, на Сайме бул „Дзень Войводини”, кед представене „Богатство розличносцох”. З тей нагоди, Войводину представали 26 викладаче, а медзи нїма на саям до Ґорнєй Радґони поволане и Туристичне здруженє (ТЗ) Руски Керестур, як член Кластеру „Истар 21”.
ДРАГОЦИНИ ЕВРОПСКИ ИСКУСТВА
Представителє покраїнскей администрациї – Покраїнски секретар за привреду и туризем Иван Дьокович и помоцнїк покраїнского секретара Серґей Тамаш, як и директор Новосадского сайму Слободан Цветкович, бешедовали з вецей членами Влади Словениї, представителями реґионалних самоуправох и привреди, як и словенскима заступнїками у Европским парламенту, о рижних можлївосцох сотруднїцтва, алє и хаснованю европских искуствох домашнїх. Як потолковал Покраїнски секретар Иван Дьокович, хтори и подредсидатель Покраїнскей влади, примарни привредни потенцияли АП Войводини вельки, алє их треба обробиц и пласовац на тарґовище Европскей униї. Праве ту може буц найвекша помоц Словениї, понеже применює нови технолоґиї и европски пракси хтори треба запровадзиц и у Покраїни. Дьокович замерковал же програма „Богатство розличносцох” зобудзела заєднїцку носталґию, хтору треба вихасновац и за привредни партнерства. Подобни упечаток здобули и учашнїки Сайму з Керестура.
По словох предсидательки Здруженя женох „Байка” Славици Катона, єй упечаток же Словенци барз заинтересовани за Войводину, а тиж и нащивйовац єй манифестациї з хторима Покраїна тиж богата.
– Указало ше же би требало виробиц и даяки заєднїцки календар шицких войводянских манифестацийох же би нащивителє могли лєгчейше плановац свойо приходи на нїх. То би ше мушело поробиц на покраїнским уровню – толкує свойо видзенє Катонова.
КЕРЕСТУРСКА ПАПРИҐА, КАПУЩАНЇКИ И БЕЛЮШИ
У рамикох Кластеру „Истар21” представели ше и национални заєднїци зоз местох Бачки Моноштор, Баноштор, Кисач, Зомбор, Руски Керестур, а як шведоча учашнїки, їх представянє було наисце репрезентативне. И сам штанд на хторим ше представели барз крашнє обдумани, поскладани и декоровани, а мал и богати змист. У форми шведского стола були виложени традицийни єдла тих националних заєднїцох, а медзи нїма и нашо капущанїки, белюши, череґи и на грубо колачи зоз деґустацию за нащивительох. Як шведоча керестурски учашнїци, нашо спомнути єдла прешли до остатку и медзи першима, бо су нєзвичайни и нащивительом менєй познати, алє и смачни. Там заблїсло и презентованє народного облєчива войводянких националних заєднїцох, та и нашо руске, понеже спомнути млади танєчнїки були облєчени до парадних шматох, а Катонова и Нярадийова до руского роботного облєчива.
Представителє Руского Керестура нащивительом покраїнского штанду понукли и промотивни материял Здруженя паприґарох „Капсикум анум”, хторе нащивительом дзелєне зоз єдну червену паприґу хтору однєсли на Саям. Виложени були и дзепоєдни продукти хтори вирабя „Байка” а тиж и други промотивни материял валала и наших манифестацийох хтори пририхтало ТЗ и други валалски здруженя и орґанизациї.
Членїца обидвох Здруженьох, и Туристичного и „Байки”, Любица Нярадийова уж мала нагоди участвовац на подобним сайме и у Будапешту, потолковала цо, по єй думаню така презентация нашей рускей заєднїци значи за сам Руски Керестур, алє и цо ище треба поробиц.
– Сами тоти смотри наисце красни и хасновити, бо нас представяю другим у шицких тих сеґментох и драгоцине же можеме черац идеї. Но добре би було витвориц и даяки материялни хасен за наших людзох, а я го, за тераз, ище нє видзим. Нєт даяки конкретни дїловни контракти, або туристични аранжмани. Правда же ту вельо робя нашо паприґаре, алє би и Туристичне здруженє требало обдумац и конкретизовац даяке туристичне понуканє, а тиж и вєдно робиц на тим шицким. Можем повесц же ше о тим нє лєм роздумує уж длугши час, алє и конкретно пробує дацо поробиц, та увидзиме цо з того будзе – заключує Нярадийова.
КЕРЕСТУРЦИ НА САЙМЕ
Туристичне здруженє (ТЗ) Руски Керестур за наступ на Сайме вибрало представительох Дому култури Руски Керестур и Здруженя женох „Байка”. Дом култури представяли Владимир Малацко и Себастиян Няради, та два танєчни пари – Ивона Будински и Златко Пап и Ана Рац и Звонко Русковски. Здруженє женох „Байка” представяла його предсидателька Славица Катона и Любица Няради спред обидвох Здруженьох.
