БЕОҐРАД – Премиєр Сербиї Александар Вучич и министер младежи и спорту Ваня Удовичич вчера прияли атлетичарох Сербиї котри на Европским першенстве у Амстердаму освоєли два медалї и повинчовали им на посцигнутих резултатох, обецали же такой виплаца награди и же обезпеча шицко цо им потребне за успишни наступ на Олимпийских бавискох у Рию, преноши Танюґ.
– Обчекуєме добри резултати у Рию, найлєпши у историї Сербиї. Пред нами и розгварки з Атлетским союзом Сербиї о орґанизованю Европского атлетского першенства у завартим, як и о можлївей кандидатури за Шветове першенство у завартим, односно за Европске на отвореним – гварел премиєр Вучич.
Медзи иншим, Вучич виражел и гордосц же по будуцим наградзованю спортистох за освоєни медалї на Олимпийских бавискох Сербия медзи пейц державами у швеце (50 000 еври за злато, заув. Танюґ).
– И на тот спсоб жадаме мотивовац спортистох, алє знаме же ше вони нє боря за пенєж, алє за герб, заставу, гимну, за державу. Но, можу раховац и на пенєж хтори уложа до дополнююцого напредованя. Винчуєм вам на успихох и жадам ище злата, стрибла, бронзи и вельо финала – гварел Александар Вучич.
У мено атлетичарох державнїком подзековал дзешецбоєц Михаил Дудаш, котри на Европским першенстве освоєл бронзову медалю.
– Атлетски союз препознава вельки таланти и резултати нє случайни. Я остатнї два роки мал вельки проблеми з повредзенями, з опадованьом резултату, а Союз и Министерство цали час були зомну, давали ми потримовку и таки приступ ше врацел з тим успихом – гварел Дудаш на вчерайшим приєму у Влади Сербиї.
Як гварене з Атлетского союзу Сербиї, посцигнути резултати на Евроспким першенстве дотераз найлєпши у историї сербскей атлетики, бо попри двох медальох – златней Ивани Шпанович и бронзовей Михаила Дудаша, аж седмеро атлетичаре були у финалних змаганьох. На Олимпияду ше пласовали 12-еро атлетичаре Сербиї.
