ДАРУНОК НАЙБЛЇЗШИМ И ПРИСУТНИМ

автор апм 29. май 2016

У рамикох манифестациї „Музеї Сербиї 10 днї од 10 до 10”, вербаска публика прешлого тижня мала нагоду слухац солистични концерт мастера ґитари Димитрия Цапа, а орґанизатор концерта бул Културни центер Вербас.

На програми були дїла за ґитару Мерца, Диенса, Тадича, Реґондия и Бариоза хтори вибрал сам уметнїк пре музични, технїчни и естетски аспект тих дїлох, як и пре їх метафизичне порученє.

Концерт отримани у шветочней сали Ґимназиї „Жарко Зренянин”, а публика, у хторей було и музичних фаховцох, барз добре реаґовала и з моцнима аплаузами потримала уметнїка, та вон виходзел и на бис.

– З ґитару жиєм од кеди ме вона вибрала за партнера, а то було на вецей заводи. Пробовал сом и з другима инструментами, алє углавним з гевтима хтори маю дроти, бо шицко друге за мнє пребарз синтетичне. Иншак, особнє любим слухац музику хтора ма три основни елементи же би була музика, а то мелодия, гармония и ритем – визначел Димитрий.

Музичар з тей нагоди гварел и же є задовольни зоз концертом, же концерт дарунок найблїзшим и шицким присутним, и подзековал гевтим хтори му помогли же би ше концерт отримало. Уметнїка тих дньох чека и концерт у Братислави – у Амбасади Сербиї з нагоди законченя специялизациї и то на жаданє сербского амбасадора, а у Братислави наступи праве з програму хтору виведол у Вербаше.

Так тот вершински млади уметнїк збогацел майски културни живот у Вербаше, цо публика знала и ценїц, а нє було мало гевтих хтори му после наступу жадали особнє повинчовац и подзековац на тим дарунку.

(Опатрене 113 раз, нєшка 1)