Диґитална публика

автор б. сакач 17. януар 2022

Указує ше же наша окремна сцелосц и витирвалосц дава надїю же ше, пре потребу социялизациї и през змену ґенерацийох и нови инвентивни приступ, превозиду тоти препреченя и же ше традиция отрима и предлужи свойо тирванє, алє у условийох новей реалносци,

а вона ше прилагодзи и трансформує до новей диґиталней, виртуалней форми

 

Почал ище єден Нови рок у трецей децениї двацец и першого вику на спомалшени способ, пре пандемию котра тирва уж други рок и уцагує нас до новей, цалком нєобчекованей реалносци, котра нас огранїчує на каждим крочаю и од нас вимага окремни напруженя у глєданю нових ришеньох. Вецей нє достаточне хасновац познати нам вариянти котри зме розвивали и пестовали роками, та аж и децениями, алє зме примушени розрабяц нови дїловни поцаги и буц порихтани зоз А, Б, а часто и зоз трецу В вариянту.

Календар манифестацийох ше сполнює, алє ше трансформує и по питаню часу кеди ше манифестациї отримую, и по питаню змистох котри часто повторени. Обласц култури почина виглєдовац нови ришеня, бо нєпреривно наиходзи на препреченя як цо то: обезпечиц членство у секцийох, потим отримац оперативни ансамбли и ґрупи, увесц нови програми и отримовац квалитетни проби, а потим и орґанизовац наступи, праве прето же ше нїґда напредок нє може знац кельо особи буду хибиц пре хороту, пре самоизолацию, пре даяку трецу причину.

Тоту нову форму мож провадзиц на рижних платформох котри нам у тей хвильки доступни. У першим шоре то кабловска телевизия и интернет, а мож их провадзиц и на ТВ апаратох, и на рахункарох, и на лаптопох и на таблетох, и на сучасних мобилних телефонох, през ТВ емисиї наживо, зняти и на одложене патренє, през рижни интернет продукциї Youtube, Netflix, Facebook и других каналох. Лєм остава єдна велька задача, окремне напруженє и схопносц за творительох тих змистох: кеди и зоз ким направиц нови змисти, програми у терашнїх очежаних условийох, бо зме нашу историю у велькей мири уж диґитализовали.

Зявює ше нове поняце – диґитална публика! Тото ше могло обчековац, бо пошвидшани темпо живота котри нам оможлївели нови технолоґиї зоз початку того вику, а котри ше уж масовно хасную, вимагаю атрактивни нови змисти и програми котри отримаю увагу патрача длуго и то у гоч котрим просторе и часу.

Шведкове зме же ше тот процес праве одбува пред нами у терашнїм часу и у обласци информованя. Глєдаю ше и понукаю лєм сензационалистични вистки, котри ше пласую директно, зоз минималним толкованьом, а часто и без нього, як сирова информация. З другого боку, до етру, а окреме прейґ интернету, ше емитую вше частейше и фалшиви информациї на цо нас спозорюю и компетентни фахово служби зоз Зєдинєних Нацийох и Европскей Комисиї. Емисиї котри третирую одредзени актуални теми на пропаґандни способ, доприноша поларизациї у дружтве и приводза патрачох до ситуациї же вецей нє можу самостойно формовац ясне думанє и завжац одредзене квалитетне становиско.

Подобни процеси розпочати и у обласци образованя, окреме у основношколским возросту дзе можеме констатовац же ше применюю шицки модели отримованя порядней настави. И за тото зме нє були порихтани, алє зме пошвидко звладали процес продукованя онлайн годзинох. Тота обовязка тиж припадла нам у Националним совиту и успишно є розпочата и докончена у найвекшей можлївей мири. Яки буду пошлїдки на формованє будуцих поколєньох тих перших ґенерацийох, пре процес стваряня диґиталней публики, укаже час.

Розпочати велї хасновити процеси и у Одборе за службене хаснованє язика и писма и очекуєме же буду реализовани у наиходзацим периоду, бо обачлїве же ше пре вельку инертносц и спомалшену функционалносц локалних самоуправох, порушани процеси ище, нажаль, нє закончели.

У тим року нас очекую значни подїї котри маю уплїв на наш дальши розвой, а то локални, парламентарни и предсидательски виберанки, потим попис жительства, а на концу рока и виберанки за национални совити. Виберанки на державним уровню даваю нєобходну стабилносц и основу за наиходзаци период. Попис жительства представя державну обовязку, бо ше на тот способ доставаю реални параметри и податки о жительству и їх обисцох. Тот попис барз значни и за Руснацох, бо од того кельо нас будзе, буду одредзовани буджети на котри зме годни раховац у идуцих 10 рокох! На концу рока буду и виберанки за национални совити и даванє можлївосц анґажованя особом котри маю идеї и добру дзеку вжац учасц у тей одвичательней роботи за нашу руску заєднїцу.

На концу, винчуєм шицким членом Националного совиту Руснацох и другим активним дїячом же вжали активну учасц у роботи одборох и роботних целох, так же зме шицки вєдно на даяки способ дали доприношенє у терашнєй роботи Националного совиту, у таких нєвигодних условийох и сполнєли велї плани котри були предвидзени за прешли рок. Шицким Рускиньом и Руснацом, и шицким добрим людзом з хторима жиєме и робиме, винчуєм Националне швето Руснацох!

(Опатрене 21 раз, нєшка 1)