„Дньовка” жвератко младих

автор сенка надь 8. децембер 2016

О тогорочней, 19. по шоре, Мултимедиялней манифестациї младих „Дньовка” сце уж читали у прешлим чишлє „Руского слова”, а з тей нагоди вам представим други бок тей програми, єй програму така яка була и яка є тераз, и прецо є значна младим.

Факт же ше нєшкайша „Дньовка” досц розликує од першобутней, такей яка була пред 19 роками. А факт и же нєшкайша младеж нє така яка була у тот час. Нє уходзиц бим до того яка була на початку, бо я теди мала лєм осем роки, та сом нє компетентна коментаровац тедишнї стил и уметносц яка була „ин”. Алє знам же „Дньовку” од початку характеризовала опущеносц, хтору ше орґанизаторе кажди рок намагаю затримац. У Доме култури зме звикли патриц углавним вирежирани програми, та так и на „Дньовку” приходза таки цо любя критично шацовац и „хейтовац”, бо обчекую совершену програму. Прето ше млади часто двоя чи наступиц, чи нє. Прето же вони аматере, а пред нїма полна Велька сала зоз публику шицких возростох. Вшелїяк же концепту програми вше мож догнац, прето же вше дацо хиби, дацо менєй заступене, а дацо заш звишок, чого зме, як орґанизаторе, и сами свидоми. Наприклад, мушим припознац же влонї програма концептуално була досц худобна, и того зме були свидоми и скорей як нам патраче то зауважели. Алє дакеди иншак нє мож. Праве влонї зме ше „шокирали” кед зме обдумали хто би ище могол наступиц, а кед нам тоти особи (котри маю аж и менєй як 25 роки) гварели же би нє барз наступац, бо ше чувствую „старо”. Вец було коментари же „Дньовка” постава „Бамби фест”, и прето зме того року пробовали прешвечиц людзох же су нє стари и думам же зме направели баланс медзи младшима, младима и „старшима младима”.

Концепт програми вше мож меняц, алє тому чому нє треба доганяц, то учашнїки, прето же окремносц того вечара младих праве у нєсовершеносци – цо ше нас дотика, можу присц бурави, у тренерки, та и у пиджами. И нє уходзиме до того цо буду виводзиц, нормално – кед то нє змисти хтори дакого директно увредзую и понїжую.

У орґанизациї „Дньовки” сом уж даскельо роки и я ю знам лєм таку яка є тераз, без того тельо визначованого бунту, контроверзних темох и шлєбоди младих. Вироятно прето же того уж скоро же нєт. Як у прешлей „Анатомиї” спомнул предсидатель нашого здруженя „Pact Ruthenorum”, млади винашли лєгчейши способ буц шмели – прейґ дружтвених мрежох.

З роками ше програма меняла у зависносци од того цо млади понукали, та мож повесц же „Дньовка” жвератко младих таки яки су и як ше ґенерациї меняли. Уж даскельо роки чувствує ше нєдостаток литературней и музичней творчосци. Маме мало младих котри творя, цо було обачиц и у наступох, понеже ше велї опредзелюю интерпретовац писнї, а мало хто наступи зоз свою писню.

Медзитим, того року публика мала нагоду чуц и патриц цошка нове – бенд у чиїм составе Кристина Афич, Павле Рац, Жарко Остоїч и Михаїл Римар, окрем обробку странскей писнї виведол и єдну нову по руски, по тексту Меланиї Римар и музики хтору направела Кристина. Окрем нїх, зоз свою авторску писню наступел и Михаил Рамач зоз Дюрдьова.

На „Дньовки” участвовали и тогорочни побиднїки за найкрасши дзивоцки и леґиньски глас на Фестивалу култури „Червена ружа” – уж спомнута Кристина Афич и Роберт Загорянски. З нагоди доставаня дзивоцкей лади и чобольова у „Руским слове” обявени и интервю зоз нїма, у хторим обидвойо гварели же им заш лєм баржей одвитує стил „Дньовки”, як „Червеней ружи”. Причини тому же „Дньовка” дава можлївосц експериментовац зоз жанрами музики, а теми писньох хтори шпиваю на тей програми сучасни и им су блїзши.

Оглядла бим ше и на реализованє програми „Дньовки” и визначим же за орґанизованє гоч якей подїї треба мац визию. На початку „Дньовку” орґанизовали даскельо поєдинци, а после даскелїх рокох тоту роботу превжало младежске здруженє „Pact Ruthenorum”. Як здогадує Сашо Палєнкаш, котри орґанизовал „Дньовку” коло 10 роки, у єдним периодзе ю ше аж и забраньовало, а заш лєм є отримана. Отримала ше и 2014. року кед „Пакт” формално нє бул активни, а орґанизацию програми теди превжало Туристичне здруженє Руски Керестур. На щесце, „Пакт” ше прешлого року подзвигнул на ноги, та знова превжал орґанизацию тей младежскей програми. А кед прежила таки часи, „Дньовка” треба же би жила ище голєм 20 роки!

Вше єст нєпорозуменя и чежки моменти, алє теди такой подумам як аж було кед „Дньовка” нє мала место отримованя, нє було пенєжу почасциц учашнїкох, а дзе ище орґанизовац журку после того, правиц маїци з лоґом, плакати и подобне, за цо тераз єст. А „Дньовка” то заслужує, прето же и сами видзице же интересованє за програму нє опадує, кажди рок сала полна зоз патрачами зоз наших, та и других местох. Прето и значне же би нашо институциї потримали тоту Манифестацию, а окреме идуцу – ювилейну, 20. Прето же зоз нову поставу „Пакту” и помоцу искуснєйших „Дньовка” може буц ище лєпша и квалитетнєйша.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 298 раз, нєшка 1)