До швета за знаньом

автор Сенка Иван 3. новембер 2016

Кед у вашей жеми вихаснуєце шицко цо вам ше понука у обласци зоз хтору ше занїмаце, а ви думаце же то нє досц, добра идея пойсц до иножемства и там на иншаки способ од нашого, дополнїц свойо знанє. На таку идею праве пришол Александар Бесерминї зоз Коцура, хтори пред конєц своїх мастер студийох на Факултету технїчних наукох, напрям рахункарска технолоґия и комуникациї, пошол до Финскей школовац ше ещи шейсц мешаци.

Як дошло до одходу до Финскей?

Александар Бесерминї: Ещи концом трецого року основних студийох, почал сом ше розпитовац же як бим могол пойсц на студентску черанку. Понеже тот єден одсек, односно унапряменє, трима RT-RK фирма, чий сом бул стипендиста, питал сом ше им же чи иснує така можлївосц. Гварели же бим ту закончел основни студиї и вец ме на мастеру даґдзе пошлю. Кед сом ше уписал на мастер, я заш то спомнул, алє було Га, то нє у интересу фирми, так же сом пренашол други способ. Кед ми на мастер студийох остало лєм одбранїц мастер, я обновел рок же бим затримал статус студента, претаргнул контракт зоз RT-RK фирму же бим могол пойсц до иножемства на черанку.

IMG_5874_1024x683

На хторим язику ши слухал преподаваня и чи ше система образованя у Финскей розликує од нашей?

АБ: За Финску ше трима же ма найлєпшу систему образованя у швеце, медзитим, я нє ишол на курси хтори на финским язику, алє на курси хтори отримовани на анґлийским язику. То автоматски значи же професоре знаю же маю роботи зоз студентами на черанки и верим же тоти преподаваня нє исти зоз тима хтори ше отримує Финцом на финским язику. Пачи ми ше же нєт прициску на студентох, значи кажде най роби кельо може и кельо сце, предмети сами вибераме хтори сцеме и кельо сцеме, нєзависно од бодох. З професорами ше могло радзиц коло проєктох, жаданьох студента… Бул и професор хторому сом мейл послал на три годзин рано и вон ми за пейц минути одвитовал. Сцем повесц же студентом професоре вше на розполаганю за догварку и консултациї. У нїх ше шицко окончує онлайн, так же нєт чеканя у шорох, и анї сом нє мал потребу дознац дзе им студентска служба. Кед ше поведло же резултати испитох буду обявени на дзешец, на дзешец обовязно були онлайн. Анї єдєн папер сом нє мушел глєдац и даґдзе ношиц, а у нас то шицко обратно.

Достал ши там даяку стипендию? Дзе ши жил?

АБ: Я конкуровал на програму evroweb plus и думам же хто ма вельке жаданє пойсц и пополнї прияву як тому шор, верим же пойдзе. Ту сом и написал же бим любел пойсц до Финскей, лєбо Шведскей, з тим же ми Финска була перше жаданє. Достал сом од нїх стипендию, а у Финскей сом вец конкуровал за змесценє. Жил сом у студентским доме.

Яка розлика кед у питаню студентски доми?

АБ: Їх доми ше барз розликую од наших. Вони маю, буквално, купени будинки и там змесцую студентох. Я жил сам и могол бим то описац же як да сом жил у ґарсонєри. Тиж, нєт портирох, зоз карточку ше уходзи до будинку, так же нє може войсц хто сце, а може ци присц хто сце, кеди сце и остац кельо сце.

IMG_6560_1024x683

Кельо ши ше, за тоти шейсц мешаци у Финскей, научел и усовершел у своїм фаху?

АБ: Там сом пошол з намиру же бим вжал предмети хтори сом ту за пейц роки школованя нє мал. Так же шицко цо сом там учел було дополнєнє на мойо знанє.

Робиш тераш даґдзе, лєбо ши робел?

АБ: Бул сом стипендиста RT-RK фирми у Новим Садзе и за нїх сом, вец, и робел. Мушел сом пре одход до Финскей претаргнуц, алє роздумуєм ше врациц, понеже ми у нїх дзвери отворени и у тей хвильки ми найвецей одвитую.

Дзе биш волєл робиц, у Сербиї, чи у иножемстве?

АБ: Мам даяки плани, алє на нїх мушим дакус ещи причекац. Гей, сцем пойсц даґдзе, нє знам ещи дзе, алє плануєм пойсц робиц „прейґа”, а вец озда и увидзим дзе ми ше баржей будзе пачиц. Затераз нє можем сиґурно повесц же пойдзем и же ше нє врацим.

DSC_0156_1024x683

Гваря же хто закончи ФТН, сиґурно находзи роботу. Цо ти гвариш на тото?

АБ: Можем повесц же то завиши од напряму. Думам же заш лєм нє шицки напрями подєднак глєдани, алє найбаржей завиши же кельо дахто добри у своєй роботи. Дахто би повед же Закончел ши програмованє, найдзеш роботу лєгко и баш ци бриґа, медзитим, то нє баш так. Стої же скоро кажде хто закончи програмованє найдзе роботу, алє од твойого знаня завиши же яку, дзе и кельо плацену. Думам же шицко завиши од твоїх амбицийох. Цо маш векши амбициї, вецей ше будзеш трудзиц же биш постал успишни.

 

(Опатрене 160 раз, нєшка 1)