Другонаградзени на „Заградковим” конкурсу

автор Мая Зазуляк Гарди
256 Опатрене

Як зме и обецали, у януарским чишлє вам представяме другонаградзених на Конкурсу подобових роботох „Заградков 75. родзени дзень”, за хтори нам, надпоминаме, сцигли аж 150 роботи зоз Руского Керестура, Коцура, Нового Саду, Вербасу, Дюрдьова, Ґосподїнцох, Бикич Долу, Кули, Беркасова, Бачинцох и Шиду. Ище раз винчуєме шицким хтори участвовали!  

Видак Ковачевич, Руски Керестур: Мам шейсц роки и ходзим до оводи. Нарисовал сом тату, себе, торту, балони, квецики и конфети. У оводи найволїм дацо правиц, а у „Заградки” там дзе мушим найсц драгу кадзи треба исц.

Маґдалена Скубан, Вербас: Ходзим до трецей класи. Од першей класи ходзим и на годзини мацеринского язика. Любим рисовац, шпивац и рецитовац, а першираз сом участвовала и на Стретнуцу рецитаторох у Кули. У „Заградки” читам писньочки и ришуєм Забавни бок. Мам пса и герчка. Пса Бобия любим дресирац, вон ме вше випровадза до школи, а  привита кед ше врацим, ходзиме и до дутяну вєдно.

Николина Копчански, Коцур: Ходзим до другей класи. Рисунок сом задумала так же би числу 75 пришли и други числа на тот родзени дзень, односно прешли родзени днї. У школи найволїм подобове, а у „Заградки” читац писньочки.

Адела Мецек, Руски Керестур: Ходзим до трецей класи. Задумала сом „Заградков” 75. родзени дзень так же на ньго пришли вельо дзеци. У школи найволїм подобове, а у „Заградки” дзецински роботи и забавни бок. Гоби ми рисованє, а ходзим и на фолклор.

Елена Варґа, Руски Керестур: Ходзим до трецей класи. Задумала сом же би на Заградковим родзеним дню була барз велька торта, же би ше ушла шицким дзецом и же би ше шицки радовали же єй родзени дзень, бо у нєй єст вельо тексти, рисунки, задатки. У школи любим шицки предмети, а у „Заградки” найволїм ришовац задатки и загадки. Ходзим до музичней школи на клавир, на анґлийски язик, фолклор, атлетику и информатику.

Елена Варґа

Даниел Фейди, Руски Керестур: Ходзим до трецей класи. Нарисовал сом торту, вельо дарунки и на моїм рисинку шицки щешлїви, та граю и шпиваю. У „Заградки” найволїм Забавни бок, а у школи математику. Ходзим на фодбал, музичне и на анґлийски язик.

Хелена Колесар, Нови Сад: Ходзим до штвартей класи. У школи найволїм подобове, сербски и руски язик, а у „Заградки” найволїм опатрац рисунки и читац состави. На годзини руского язика ходзим од першей класи и найволїм кед пишеме, або кед рисуєме. Любим и кед нам учителька чита даяки писньочки котри написали руски писателє. Кед слобо о гобийох, найволїм рисовац кед сом дома, а ходзим и на фолклор до КУД „Жатва” у Коцуре. На рисунку котри сом послала до „Заградки” з нагоди єй 75. родзеного дня, нарисовала сом двойо дзеци котри славя родзени дзень коло торти на три поверхи. Задумала сом же би торта була велька, понеже то красни ювилей и наш часопис то заслужує. 

Тияна Дюрдєвич, Ґосподїнци: Ходзим до седмей класи. У школи найволїм историю, бо ми є барз интересантна. На годзини руского язика сом почала ходзиц у другей класи, бо моя баба Рускиня, та и я сцем научиц руски язик. За Конкурс сом нарисовала медведжика зоз дарунками и винчованку. Мой гоби то рисованє и одбойка.

Николина Гарди, Руски Керестур: Ходзим до штвартей класи. На моїм рисунку ноцна журка, гвизди падаю з нєба и славя родзени дзень. У школи найволїм физичне, а у „Заградки” лавиринт. Ходзим на рукомет, на фолкор и на атлетику.

Николина Гарди

Николина Олеяр, Руски Керестур: Ходзим до штвартей класа. Задумала сом най на „Заградковим” родзеним дню буду дзеци хтори тримаю коцки дзе пише „Заградка”. Длуго ми требало же бим нарисовала тот рисунок. У школи найволїм математику, алє любим и шицки други предмети. У „Заградки” любим фарбиц и читац. Ходзим на атлетику и на фолклор.

Николина Олеяр

ПОВЯЗАНИ ТЕКСТИ