Дуня Гнатко отворела розсаднїк у Бикичу

автор В. Дїтко 8. авґуст 2015

З оглядом же у Шидзе нє годна достац роботу у своїм фаху Дуня Гнатко, дипломована инженєрка пейзажней архитектури, одлучела порушац власни бизнис у Бикичу. Реґистровала польопривредне ґаздовство и обок сучасного овоцнїку яблукох хтори засадзел єй оцец Звонко, дипломовани инженєр овоцарства и винїцарства, почала продукцию украсних древкох и квеца на отвореней поверхносци. Єй амбициї у роботи, медзитим, вельо векши.

– Тераз мам даскельо файти туйох рижних фарбох и велькосцох, потим чемпреси, ядловци, берберис и евонимус. Тих дньох бим мала достац пресаду жимских ружох хтори починаю квитнуц од конца авґуста по октобер. Пририхтуєм ше и за пресаду познатого квеца виола у народзе познатше як ,,дзень и ноц,” и украсней капусти – гвари инж. Дуня Гнатко, хтору зме застановели праве у роботи у розсаднїку хтори ше находзи на добрим положеню, такой коло главней драги на виходзе з валалу, на главней драги Шид-Илок.

Дуня припознава же би до роботи нє могла войсц ,,лєм так”, кед би нє було помоци родичох, окреме оца хтори єй обезпечел локацию и пошорел дїловни простор з адаптацию старей хижи хтора ше ту находзела. Мац Савета єй тиж помага, бо вше треба дацо постарчиц коло младнїкох, а окреме водзиц рахунка коло залїваня рошлїнох пре бездижджовни период.

Дзекуюци финансийней потримовки Фонду за потримованє польопривредней продукциї, наша собешеднїца купела пластенїк поверхносци 204 квадратни метери, а спомнути Фонд би мал рефундировац значну часц средствох. Пластенїк би требал буц порихтани до яри, же би концом жими почала продукция мушкатлох, сулфриниї и другого квеца у черепчкох. На маєтку ше находзи и базен з хторого ше хаснує вода за залїванє овоцнїка яблукох на пейцох гектарох, а тиж и за потреби розсаднїку.

– На початку продукция у пластенїку будзе без зогриваня, бо то драга инвестиция и можебуц о два роки ше и за тото остарам. Тераз найзначнєйше же би продукция була успишна и же бим ше ,,пребивала” на тарґовищу. Бо, нє достаточно лєм дацо випродуковац, алє ше то муши и предац. Наздавам ше же ми добре положенє розсаднїку коло драги, дзе вше преходза авта хтори иду ґу гранїци, поможу попредац випродуковане. Увидзим и цо ше найвецей глєда и цо мож найшвидше попредац и у тим напряме убудуце будзем розвивац продукцию – гварела нам на концу опстимистично инж. Дуня Гнатко.

Фамелия фаховцох

 У фамелиї Гнатко оцец Звонко дипломовани инженєр овоцарства и винїцарства и уж децениями познати продукователь овоци (брескиньох, яблукох и грушкох). Дзивка Марина дипломована инженєрка защити рошлїнох и занята є у єдней приватней фирми. У фаху, досц блїзким, остала и Дуня хтора дипломована инженєрка пейзажней архитектури.

(Опатрене 144 раз, нєшка 1)