РУСКИ КЕРЕСТУР – У Велькей сали Дому култури у Руским Керестуре вчера пририхтана пригодна програма з хтору наймладши Керестурци и того року дочекали Дїда Мраза, а вон им подзелєл скоро 190 пакецики.
Новорочну програму зоз шпиванками, рецитациями и граньом пред Дїдом Мразом, патульками и полну салу з дзецми, їх родичами и найблїзшима, пририхтали дзеци з керестурских воспитно-културних установох.
Наступели дзеци з Музичней оводи, под руководительством Татяни Фейди, потим дзеци вихователькох Емилиї Костич и Ксениї Вучкович з Оддзелєня „Цицибан” ПУ „Бамби”, Рецитаторска секция нїзших класох ОШ „Петро Кузмяк”, котрих пририхтала учителька Наталия Зазуляк, школяре керестурского Оддзелєня ШОМО з Кули – як солисти и у малим оркестру, под руководительством Мирона Сивча, та Дзецински хор „Шкорванчки” Дому култури, з хторим руководзи Юлиян Рамач Чамо.
Дочек Дїда Мраза традицийно орґанизовала Месна заєднїца, а прейґ Каритасу и того року подзелєни 20 пакецики дзецом зоз социялно загрожених фамелийох.
Нєшка, 31. децембра на пол ноци, Керестурци у центре валалу годни заєднїцки дочекац Нови рок, з традицийним огньометом. Музику ше у центре валалу почнє пущац на 23 годзин.
