Емисия „Живот з вашого угла”

автор А. Римар 20. новембер 2015

Нова забавно-едукативна емисия ше на габох Радио Нового Саду  емитує кажди пияток на 13:30 годзин. Реализує ше у рамикох нєзависней продукциї РТВ, а єй автор Иван Канюх, студент историї  зоз Нового Саду.

Одвичательна редакторка рубрики на руским язику Златица Няради, поволала Ивана Канюха же би обдумал и витворел емисию у рамикох нєзависней продукциї РТВ, бо видзела же є активни у рускей заєднїци и же дзекуюци тому сиґурно позна велїх людзох, цо вшелїяк важне за таку роботу. Требало емисию хтора може буц и за младих, алє и за старших, та, окрем же є едукативного характеру, ма и риси забавней емисиї, а теми обрабя през три рубрики.

− То насампредз рубрика о активизме и волонтеризме у хторей ше намагам промовововац шицки аспекти волонтираня и активизма вообще, напр. бициґлизем як способ живота. Гоч людзе знаю же волонтеризем робота задармо, нє свидоми су же кельо знаня и искуства мож достац през волонтиранє, а то може помогнуц кед ше глєда роботу, як младим, так и старшим. У другей рубрики ше обрабя табу теми, теми о хторих ше нєдзечнє бешедує. Слухаче можу чуц цо нашо собешеднїки думаю о даєдней теми, а на концу фаховец з обласци з хторей ше одредзену тему обрабя, розтолкує проблематику. Треца рубрика „Швет коло нас” и през ню ше информує слухачох о актуалних темох у нашим дружтве, як напр. о вибеженскей кризи, або о даєдней теми з науки, напр. о води на Марсу, алє єст и теми з релиґиї − толкує Иван.

Будзе ше емитовац штерацец таки емисиї, а Иван гвари же то и за ньго нагода же би ше образовал и дознал вецей о темох хтори го цикавя.

− Кед сом бул на другим, або трецим року студийох, похопел сом же жиєме у часох кед ше чежко доходзи до роботи и же ше млади єдноставно муша „пребиц на тарґовищу” и активовац ше, вше буц присутни у заєднїци, бо лєм так их обача гевти од хторих познєйше будзе завишиц їх робота. Ми, млади, ше мушиме сами порушац, нє можеме лєм чекац роботу. Кажде може пренайсц дацо цо го интересує, активовац ше у тей обласци и постац конкурентни, а дахто конкурентни кед ма знанє, искуство и кед позна велїх людзох − заключує Иван Канюх.

(Опатрене 212 раз, нєшка 1)