Женски вредни руки и креативносц тиж доприноша локалней заєднїци

автор зам 30. юлий 2015

На инициятиву и у орґанизациї Здруженя женох „Идея” з Кули, на площи опрез Пошти у центре Кули стреду, 29. юлия, отримани перши Лєтнї фестивал ручних роботох и сувенирох. „Идея” на Фестивал позберала подобни здруженя женох з местох кулскей општини, медзи нїма участвовало и керестурске Здруженє женох „Байка”, та зоз сушедних општинох – з Вербасу, Зомбора, Бечкей Паланки…

У орґанизациї того подняца, хторе би, як поведзене на отримованю, мало постац традицийне, участвую и Општина Кула, та Туристична орґанизация и Аґенция за розвой кулскей општини, а потримовку у представяню широкей лепези ручних роботох вредних женских рукох дали и числени спонзоре – рижни погосцительни и тарґовински роботнї з Кули.

Лєтнї фестивал ручних роботох и сувенирох стреду тирвал цали дзень, а на отвераню тей и предавацкей вистави бешедовали директор Туристичней орґанизациї Општини Кула Владимир Станкович, спред Аґенциї за розвой Општини Кула Милана Дякович, як и предсидателька Здруженя женох „Идея” Серафина Бики котра, попри другим з локалней самоуправи, окреме подзековала Рускому КУД „Др Гавриїл Костельник” у чиїх просторийох Здруженє поряднє роби, а хторе помогло и у снованю Здруженя. Фестивал урядово отворела предсидателька Скупштини општини Кула, а шицки бешеднїки повинчовали „Идеї” на таким подняцу, наглашуюци же зоз свою роботу и креативносцу постава вше препознатлївше у женскей творчосци, як и же и „Идея” и други подобни здруженя, доприноша розвою локалней заєднїци.

Отверанє Фестивалу збогацела и пригодна културно-уметнїцка програма, у хторей участвовали дзеци з ПУ „Бамби”, Мишана шпивацка ґрупа РКУД „Др Гавриїл Костельник”, под руководительством Еуфемиї Планкош, хаснователє Здруженя за ментално нєдостаточно розвити особи „Плава птица” з Кули, шпивачка Мадярского културного центру „Непкер”, та дзепоєдни кулски рецитаторе.

Як на отвераню орґанизатором пожадала предсидателька СО Кула Снежана Мркаич – най би и тот фестивал постал традицийни, по чим Кулу тиж убудуце буду препознавац, як цо є позната по Фестивалє аматерских театрох Сербиї.

(Опатрене 100 раз, нєшка 1)