Замишиц цесто зоз новей муки

автор люр 19. авґуст 2016

Идуцого викенду, 26. и 27. авґуста у Новим Орахове по петнасти раз будзе отримана Културна манифестация „Днї нового хлєба”.

Першого дня, всоботу, ше отримаю спортски и забавни бависка, у малим фодбалу и кошарки. Змаганя почню на дзевец рано, а спрам приявених екипох завиши як ше будзе бавиц. За першопласованих предвидзени награди и припознаня. Бависка без гранїцох почню на пол пиятей пополадню, на нїх вше єст надосц нєпредвидзени ситуациї, забави и шмиху, и вельке интересованє нє лєм Ораховчаньох, алє и людзох з околини. После того ушлїдзи диско на отвореним.

Другого дня, внєдзелю, на єденац пред поладньом будзе змаганє у вареню паприґашу, на два пополадню у голу Дома култури ше отвори виставу ручних роботох а опрез и вашар ручних роботох, а на три годзин будзе Служба Божа на котрей ше пошвеци нови хлєб. У Руским доме писатель Часар Левенте представи нову кнїжку, по улїцох ше прейду фиякеристи, а на пейц пополадню дзешец културно уметнїцки дружтва отримаю културну програму. Док будзе чечиц програма, публики ше будзе понукац цепли бухти.

На вечар будзе концерт на котрим буду шпивац Жарко Прибакович и Атила Кекинь зоз Бачкей Тополї, односно „Асове” зоз Трешнєвцу.

Хто ше сце приявиц на спортски бависка, и бависка без гранїцох, вецей информациї може достац на телефон 0643379963. Орґанизатор манифестациї „Днї нового хлєба” Месна заєднїца Нове Орахово, односно нєвладово орґанизациї, културно-уметнїцки и спортски дружтва.

(Опатрене 118 раз, нєшка 1)