За Михаила Дудаша покалїченя – прешлосц

автор тсал 12. децембер 2015

Пририхтованя за наиходзацу сезону у цеку. Даєдни нашо атлетичаре уж ше пририхтую, а други ше лєм рихтаю пойсц. Як пише „Блиц”, найлєпши дзешецбоєц, Михаил Дудаш, уж навелько  тренира и тераз є у Южней Африки.

– Заш лєм сом ше одлучел за тото место, бо ми трениранє на терену зоз трави, найбаржей одвитує. Причина же сом  подло наступел прешлого року були мойо запалєни тетиви и покалїченє „заднєй ложи”, та барз добре же сом ту у цеплим и мегким – гвари Дудаш.

Вон гвари же є тераз здрави  и же ше наздава же так и останє.

– У сотруднїцтве зоз своїм тимом, на хторим окреме дзекуєм, пренаходзиме ришеня же бим бул порихтанши за змаганє у Амстердаму и Риу, а за физичне пририхтованє можем подзековац тренерови  Федьови Камасийови – толкує Дудаш.

У зависносци од того чи будзе дзешецбой на Куби и чи ше прилапи же би ше змагал на їх терену, одлучи о початку змагательного периоду.

Кед нє будзе дзешецбой, враци ше до Европи дзе ше будзе змагац у даскелїх седмобойох и вери же будзе найблїжей при свойому найлєпшому резултату хтори посцигнул у Ґетеборґу.

– Циль у 2016. року – успих на двох подєднак важних змаганьох –  на европским першенству у Амстердаму и Олимпийских бавискох у Риу. Перше на шоре европске дзе жадам „наплациц” штварте место зоз Гелсинкия, а после до Риа  пойдзем розтерхованши. Кед же „поклопим” свойо особни рекорди у шицких дисциплинох, годзен сом витвориц свойо цилї – гварел Михаил Дудаш за „Блиц”.

(Опатрене 141 раз, нєшка 1)