КУЛА/ЛИПАР – Гуманитарна акция за помоц Планчаковим, хтори жию у нєадекватних условийох, на старим салашу медзи Кулу и Липаром, тирва уж коло мешац, а всоботу 5. априла орґанизовало ше першу озбильнєйшу роботну акцию.
У тей акциї найвецей ше оправяло закрице хторе було у барз критичним станю, поставело ше хижку за аґреґат, хижку за карнистери з воду, а розчисцовало ше и простор за поставянє контейнеру за биванє, за чийо ше купованє, од нєдавна, збера донациї.
Сам контейнер за биванє кошта 3.100 евра, алє окрем нього будзе требац виплациц трошки и за його превоженє, витоварянє, бетониранє подлоги и подобне. По його поставяню, контейнер будзе требац опремиц и зоз билу технїку и мебльом.
На тот завод, порушана акция збераня пенєжох перше за купованє контейнеру за биванє, та ше донаторски шкатули находза на шлїдуюцих локацийох у Руским Керестуре – у предавальньох „Тренд Би” и „Фреш-маркет”, у Каритасу, Землєдїлскей задруґи „Керестурска паприґаˮ, Транспортним центре „Ковач”, „Виславски делови М”, а шицко под слоґаном „Нашо кущик, дакому вельо…”.
У акциї всоботу участвовало Добродзечне огньогасне дружтво зоз Руского Керестура, на помоци було и Огньогасне дружтво з Кули, потим Месна заєднїца Руски Керестур и велї вредни и гумани поєдинци з валалу.
Здогаднїме, Юлиян и Рожа Планчаково, маю кус менєй од 80 роки, на салашу жию роками, там одховали и штверо дзеци, медзитим, пре старосц и хороту вецей ше нє можу старац о себе, та им помоц нєобходна.
За подробнєйши информациї о помоци коло акциї, мож контактовац Йолея Боду на число 061/169-74-13.
