Златни заренка нашей сцелосци и витирвалосци

автор о. планчак сакач 27. авґуст 2021

У Дюрдьове, прешлей соботи, отримани 18. Фестивал жридлового шпиваня „Най ше нє забудзе”. Фестивал сцигол по свойо полнолїтствиє през вельки труд, ентузиязем и упартосц домашнього КУД „Тарас Шевченко” у намири зачувац нашо найстарши жридлово шпиванки и пренєсц тоту традицию и любов ґу етносу младшим ґенерацийом.

Труд и любов ше виплацели, бо Дзивоцка шпивацка ґрупа зоз Дюрдьова, превжала пестовац тото цо любели їх баби и прабаби и на бини заблїсли таки поприберани, як руски дзивки пред сто роками. И, наисце, нє лєгко нєшка заплєсц варґочи и положиц баршонь до власох, бо то вимага вельо часу и труду, а у широких сукньох нє мож анї шеднуц, же би ше нє погужвали. Дюрдьовски дзивки нє лєм же су побиднїци Фестивала, цо заслужели зоз своїм шпиваньом, алє зоз пиху и  вельку любову ношели тото дакедишнє руске народне облєчиво, цалком так, по шицких правилох, як то бул обичай и дакеди.

За кажду похвалу и коцурска Женска шпивацка ґрупа, хтора освоєла специялну награду, бо през шпиванку винєсла нову енерґию, а до свойого випатрунку додала и хусточки, бо их два шпивачки шмело положели на главу. Хусточка була часц и нашого народного облєчива, та би ю требало на бину врациц и нашу народну традицию преношиц младшим поколєньом правилно. О тим написана кнїжка зоз шицкима можлївима деталями, пояшнєнями и фотоґрафиями, а на дружтвох же би ше ґу тому прилагодзели, бо знаме же у нашей прешлосци исновали строги правила цо ше кеди и як ношело.

Дюрдьовски фестивал змагательни так же ше фестивалска атмосфера чувствовала на каждим крочаю, кажде дружтво ше трудзело вибрац цо красши шпиванки з нашей народней жридловей скарбнїци. Фестивал бул и медзинародного характеру, бо на нїм учасц вжали и два дружтва з иножемства, зоз Републики Горватскей на Фестивал пришли Петровчанє и Миклошевчанє.

И, так як поведзене на отвераню Фестивала, дзень за дньом, рок за роком докладани златни заренка зоз сцелосцу и витирвалосцу, та Фестивал сцигол по свойо полнолїтствиє. Можеме ше наздавац же нашо руске єство ище будзе чувац свойо и же ше традицию Фестивала предлужи по нови рочнїци.

Млади нє лєм з Дюрдьова, алє и зоз Коцура прилапели и пестую жридлове шпиванє и до ньго укладаю свою енерґию, бо красна шпиванка нє важне якого є жанру, важне же би була точно по нотох одшпивана, по можлївосци двогласно, цо у нашей традициї, та вец ше краса звуку розлєє, так як и дакеди пред сто и вецей роками… А, Руснаци, тото свойо найкрасше и наймилше, руску шпиванку, пестую и чуваю на тих войводянских просторох уж три вики. Най би так остало и потирвало.

(Опатрене 29 раз, нєшка 1)