КУЛА – Здруженє за помоц ментално нєдостаточно розвитим особом (МНРО) „Белава птица” у Кули, поставело Ивану Зазуляк Папуґа з Руского Керестура за нову окончовательку длужносци директора того Здруженя.
На Скупштини Здруженя „Белава птицаˮ и по одлуки Управного одбору, Ивана Зазуляк Папуґа на функцию окончовательки длужносци директора менована у авґусту, кеди и прилапене задзекованє потедишнього директора Марка Кошутича, а хтори задзекованє дал пре особни причини.
Условия за место директора хтори кандидат требал сполнїц то же би мал пейц роки роботного искуства у установи з обласци социялней защити, як лиценцу за роботу зоз спомнутей обласци. Обидва условия сполньовали три кандидаткинї заняти у „Белавей птициˮ, а лєм ше Зазуляк Папуґова и прилапела тей функциї.
Ивана Зазуляк Папуґа основну школу и Ґимназию закончела у Руским Керестуре, а Факултет за специялну едукацию и регабилитацию у Беоґрадзе, напрям Специялна едукация и регабилитация глухих и наглухих особох. Ивана од 2014. року занята у Установи „Белава птицаˮ.
