Иван Киш добитнїк рочней награди

автор опс 24. юний 2016

Прешлого викенду, пияток, 17. юния, студенти зоз новосадскей Академиї уметносцох мали заєднїцку дипломску виставу у Ґалериї подобових уметносцох Леґату Райка Мамузича. Медзи студентами свойо роботи викладал и наш млади, талантовани уметнїк Иван Киш зоз Дюрдьова, котри и добитнїк рочней награди за найуспишнєйшу уметнїцку роботу зоз уметнїцкей дисциплини скулпторства, а кандидат є и за награду Фондациї „Мали принц”.

З тей нагоди Иван Киш за нашо новини гварел:

– Часто пребувам у природи, та оталь и мойо инспирациї, гоч их витворим як скулптури, гоч як рисунок, або у гоч хторей форми уметносци. Конкретно, цо ше дотика моєй дипломскей вистави, роботи базовани на, я гварим лїсцу, як приклад єдней стаємней пременлївей форми у природи, алє вше охабям простор своєй публики же би вони сами видзели цо жадаю и як вони сцу дожиц мою роботу. Мойо скулптури у нєпреривним циклусу живота, гоч их указуєм на половки згнїти, найчастейше флоралних мотивох, а сама тота шлєбодна маса постава найбогатши гумус моєй будуцей уметнїцкей творчосци – гварел Киш.

Припатраюци ше на Иванову дипломску роботу, мнє особнє випатрала як криделко, криделко шитара, зоз асоцияцию на ладю плахтарку, а чи лїсце, чи кридло, то символи вичного рушаня и вичней пременки, бо рушанє то живот… Пред Иваном Кишом ше отвера єдна успишна уметнїцка кариєра, а як нам гварел, у планє му ше уписац на мастер або у Новим Садзе, або у Беоґрадзе.

(Опатрене 153 раз, нєшка 1)