Ище єдна побида дюрдьовских фодбалерох

автор л. вереш
118 Опатрене

ДЮРДЬОВ – У 21. колу Подручней фодбалскей лиґи Нови Сад, хторе одбавене 23. априла, фодбалере ФК „Бачка 1923” зоз Дюрдьова победзели фодбалерох зоз Катю.

Бачка добре почала, анґажовано и нападацки. Таке бависко ше виплацело, бо перша лабда затресла ґол домашнїх на самим початку стретнуца, у 7. минути. Ище єден ґол за Бачку спаднул у 14. минути. Домашнї ше одупарли прициску и у 19. минути дали свой перши ґол.

У другим полчасу було досц добри напади и вельо можлївосци же би ше резултат пременєло, алє по сам конєц стретнуца резултат остал исти. У остатнєй минути змаганя, у предлуженю, фодбалер Бачки Милан Роґич дал свой други ґол на стретнуцу, а треци за дюрдьовски клуб.

После того кола Бачка ше випендрала на 6. место на таблїчки зоз 30 бодами. У шлїдуюцим колу дюрдьовски фодбалере на домашнїм терену дочекую фодбалерох зоз Футоґу.

ПОВЯЗАНИ ТЕКСТИ