И далєй спореня о вименкох Закона о польопривредней жеми

автор сен/зам
1k Опатрене

НОВИ САД/БЕОҐРАД – Предсидатель Покраїнскей влади Боян Пайтич вчера отримал схадзку з представителями 17 здруженьох польопривреднїкох, на хторей бешедовали о чкодох хтори спричинї применьованє нового Закона о польопривредней жеми, преноша нашо медиї.

– Таки Предлог оможлїви тайкуном же би вжали под аренду найквалитетнєйшу державну жем на 30 роки. Закон дискриминаторски, прето же пенєж будзе вжати од малих польопривреднїкох и тото предписанє увредзує шицких гражданох Сербиї, а найбаржей Войводянох, дзе ше и находзи найвекша часц державней жеми – гварел Пайтич.

 Покраїнски премиєр поволал републичних посланїкох и премиєра Сербиї Александра Вучича же би нє прилапели Закон, а кед го прилапя, Пайтич апелує на предсидателя же би Закон врацел на розпатранє. Кед нє будзе слуха за польопривреднїкох, Пайтич наявел протести опрез будинкох Предсидательства и парламенту.

Предсидатель Асоцияциї польопривреднїкох Войводини Мирослав Киш гварел же парасти з Войводини протестую уж 30 днї и наявел же у наиходзацих дньох радикализую протести.

После розгваркох з Пайтичом, представителє бешедовали и з предсидательом Скупштини АП Войводини Иштваном Пастором, котри гварел же у Скупштини Сербиї винєше 6 амандмани на спомнути Закон, хтори ищє скорей принєсла Скупштина АПВ.

На другим боку, представяюци вчера вименки Закона у Народней скупштини, министерка польопривреди и защити животного штредку Снежана Боґосавлєвич Бошкович гварела же вименки нє предвидзую предаванє жеми странцом.

ПОВЯЗАНИ ТЕКСТИ