Кнїжки укажу як ше ґаздує

автор А. Маркович 29. авґуст 2015

Єдно од условийох и задаткох на драги приблїжованя Сербиї ґу ЕУ то и формованє єдинственей системи евиденциї рахунководительних податкох на польопривредних ґаздовствохУ нєшкайших условийох вше баржей треба мерковац на шицки аспекти продукциї, а насампредз важне провадзиц економски указателї дїлованя польопривредних ґаздовствох. Озбильни продукователє, гевти котри у системи ПДВ маю свою систему водзеня евиденцийох на польопривредним ґаздовстве, док векшина других продуковательох цо маю потенциял и продукцию хтору нє мож занєдзбац, у тей хвильки у ситуациї же нєсистематично водза евиденцию, кому ше як видзи, бо потераз у Сербиї нє було єдинственей системи уводзеня евиденциї и рахунководительних податкох.

– Шицки жеми членїци ЕУ маю єдинствену систему за провадзенє кнїжководительних податкох на польопривредних ґаздовствох (ФАДН) хтору ше запровадзує по єдинственей методолоґиї од 1965. року.

Дзекуюци такей системи за провадзенє одредзених економских указательох, податки хтори ше будзе провадзиц на польопривредних ґаздовствох годно поровнац медзисобно у Сербиї, алє и реґиону, та и цалей Европи – гвари дипломована инженєрка аґроекономиї Емилия Баяц зоз Польопривредней фаховей служби Вербас, хтора визначела же водзенє евиденцийох и участвованє у ФАДН системи затераз добродзечне.

Процедура така же на початку рока ношителє уключених ґаздовствох з помоцу польопривредних совитодавательох пополнюю ФАДН питальнїки дзе основни податки о ґаздовстве, резерви и обовязки хтори ше преноши з прешлого року.

Питальнїки составени з формуларох зоз упутствами за пополньованє одвитуюцих податкох. У нїх ше уписує и основни податки о совитодавательови, шатвовей структури, статку, жеми зоз огранїченима урожаями, та роботна моц, вецейрочни заградки, провадзаци обєкти, механїзация и опрема, общи трошки, длуства на початку обрахункового периоду, резерви материялу, хаснованє жеми, субвенциї и подобне.

На концу календарского рока, до пописних лїстинох уноши ше вименки котри настали од початку обрахункового периоду. Закончуюци попис на концу календарского рока источашнє и початни попис за наступни рок.

– Методолоґия ФАДН оможлївює рахованє велького числа економских указательох, наприклад: вкупни приход, вкупни вариябилни трошки, амортизацию, бруто и нето додату вредносц, доходок, основни средства, пременку вредносци власного капиталу, бруто и нето инвестициї, пенєжни цек и маржу покрица. На концу обрахункового периоду продукователь достава од свойого совитодавателя повратни звит у хторим акцент на главних економских указательох у ґаздовстве зоз додатнима коментарами и совитами за польопривреднїка – потолковала Баяцова.

Формованє рахунководительних податкох на фармох у Републики Сербиї значни продуковательом, бо на бази провадзеня податкох на своїм ґаздовстве можу точно видзиц як ґаздую, поровнац ше з ґаздовствами подобней велькосци и ориєнтовац у жеми и реґиону, та прецизнєйше и квалитетнєйше приношиц дїловни одлуки и на тот способ напредовац и витвориц хасен за свойо ґаздовство.

Прето важне же би ше цо вецей продуковательох уключело до системи провадзеня рахунководствених податкох на своїх маєткох, и то на тот способ же ше явя свойому совитодавательови у польопривредней фаховей служби котрей териториялно припадаю.

(Опатрене 181 раз, нєшка 1)