Конкурс за автошедзиска тирва ище тидзень

автор С. Саламун
506 Опатрене

ЖАБЕЛЬ – Конкурс за додзельованє безплатних дзецинских автошедзискох котри розписала Општинска рада Општини Жабель и Совит за безпечносц у транспорту општини, у сотруднїцтве зоз Аґенцию за безпечносц у транспорту Републики Сербиї, тирва ище тидзень, односно по пияток, 22. новембер.

Єден з условийох за доставанє безплатного автошедзиска же би родичи присуствовали на едукациї о їх хаснованю, як и же дзецко народзене у прешлим року, же є першенародзене у фамелиї односно при обидвох родичох, же би голєм єден од родичох мал пребувалїще на териториї општини найменєй два роки и же голєм єден од родичох власнїк авта. Кед же першенародзене дзецко двойнятка – и друге дзецко достанє автошедзиско.

З документацию треба приложиц дзецков вивод зоз матичней кнїжки народзених, фотокопию особней карточки або очитану карочку дзецкового оца, очитану вожацку дозволу, як и пополнєти формулар котри мож превжац на сайту Општини Жабель. Формулар и други информациї о Конкурсу мож достац у будинку Општини, у улїци Николи Тесли 45 у Жаблю, у канцелариї число 108 або на 021/210-22-68.

Подполну документацию треба придац до Шалтер сали у општинским будинку у Жаблю або по пошти, послац на уж спомнуту адресу и з обовязним надписом у обидвох случайох Явна поволанка за едукацию за правилне хаснованє автошедзискох – нє отверац.

ПОВЯЗАНИ ТЕКСТИ