Коцурски дзеци здумую креативни бависка

автор Т. Ходак 9. авґуст 2015

Коцурски школярики, и тоти рапухи цо ше ище вше лєм бавя дома, попри дробних дзецинских обовязкох маю надосц часу же би здумали як ше буду бавиц. Озда у тим и чаривносц дзецинства. Дзеци зоз Ґрмечкей улїчки у Коцуре уж єден час здумую наисце креативни бависка у хторих, окрем їх мамох и татох, уключене и сушедство, баби и дїдове и цала родзина.

Так прешлого штвартку дзеци орґанизовали виставу малюнкох хтори сами намальовали, на шлєбодну тему. Гоч вистава була отворена – Михайло, Петар, Павле и Зоран Бушово, Желько и Ясна Перенчевич, София Шкорич, Мартина Роквич, Исидора и Душица Бркич и далєй мальовали и докладали малюнки же би их було цо вецей. Виставу пришла опатриц родзина и сушеди, а по „отвераню” вистави, дзеци одбавели закончуюци меч турниру у фодбалу, у хторим участвую праве вони, подзелєни до двох екипох.

DSC_0169

Мацери толкую же дзеци сами обдумую бависка, и же таки вистави и други збуваня нє ридки на їх улїчки.

– Окреме су креативни и зложни. Вони дацо здумаю, а ми им обезпечиме тото цо им потребне. Чи то папер и водово лєбо древени фарби, чи крейди, чи  папер у фарби, лєбо дацо треце. Дакеди ше врациме дому оддакаль а вони себе винєсли вонка столи и карсцелї, и шицко цо им потребне та рисую – гвари Ясмина Буша.

Ясмина толкує же вони у обисцу нє маю компютер и же дзецом вон вообще нє хиби. Вжиме єдни бависка, влєце други, и нїґда им нє допито.

Mihajlo zoz improvizovanu novinku

Дзеци нєдавно на улїчки направели кафич, дзе приходзели баби и дїдове купиц сок, а за заробени пенєжи дзеци себе купели материял за свойо задумки. Тиж так здумовали и рижни представи, маскенбали, маю свою музичну ґрупу хтори ше вола „Кул мюзик” дзе уча шпивац шпиванки и по сербски и по руски, та и английски, а вец их знова за исту публику виводза. Тиж так маю и свою новинку хтору составели зоз цикавих слупчкох зоз других новинкох, и нарисованих и ручно виписаних паперох, та новинку викопирали же би кажде мал прикладнїк.

На концу того дня два фодбалски екипи наволани „Червена гвизда” и „Партизан” подзелєли погари, хтори сами справели. Єден за перше место, други за друге, и треци за найлєпшого бавяча.

Потим уж здумовали як ше буду бавиц наютре.

Уход до ґаражи вихасновани за креативни роботнї

Уход до ґаражи вихасновани за креативни роботнї

(Опатрене 125 раз, нєшка 1)