Коцурци на Швету култури у Свиднїку

автор тах
1.1k Опатрене

СВИДНЇК – На 61. Швету култури Русинох-Українцох Словацкей у Свиднїку, хтори отримани од 19. по 21. юний, участвовало и коцурске Културно-уметнїцке дружтво „Жатва”. На Фестивалє у Свиднїку була и делеґация Союзу Руснацох Українцох, делеґация Националного совиту Руснацох у Сербиї, як и даскельо члени Роботного цела за младеж Националного совиту Руснацох.

Пред наступом у Свиднїку, аматере „Жатви” участвовали на на Фестивалу єдла и пива у Бардейове, а нащивели и Куров, з хторим Коцур сотрудзує вецей як 20 роки, так же и делеґация того места зоз Словацкей будзе госц на тогорочней „Коцурскей жатви”, у юлию.

У Бардейове и на отвореней сцени Швета култури у Свиднїку участвовал виводзацки танєчни ансамбл КУД „Жатва” зоз штирома хореоґрафиями, шпивацка ґрупа, як соло-шпиваче наступали Дарина Михняк и Танита Ходак, а шицких провадзел тамбурови оркестер Дружтва.

Попри госцуюцих ансамблох зоз Сербиї, України и Польскей, з тих просторох на Швету култури у Свиднїку участвовали и аматере з КУД „Яким Гарди” з Петровцох и КУД „Яким Ґовля” з Миклошевцох, з Горватскей.

Млади з Роботного цела за младеж на Фестивалу у Свиднїку, на окремним штанду, представели младежски виданя по руски – часопис МАК и дзепоєдни нашо учебнїки, толкуюци заинтерсованей публики цо и як робя млади Руснаци у Сербиї

Коцурци нащивели и Музей українскей култури у Свиднїку, як и етно-комплекс Сканзен, а у делеґациї Союзу Руснацох Українцох Сербиї и Националного совиту Руснацох участвовали на церемониї кладзеня венцох ґу памятнїком на Дуклї и у Свиднїку. За орґанизаторох Фестивалу и шицки иножемни делеґациї, городоначалнїк Свиднїку Ян Голодняк пририхтал шветочни приєм.

Госцованє на Швету култури у Свиднїку орґанизовал Союз Руснацох Українцох Сербиї, з материялну потримовку Националного совиту Руснацох, а у сотруднїцтве з главним орґанизатором Фестивалу – Союзом Русинох-Українцох Словацкей Рeпублики.

КУД „Жатва” на Фестивалє у Свиднїку (у ґалериї и у Бардейове)

ПОВЯЗАНИ ТЕКСТИ