ЛСВ: „Коалицийнe спорозуменє зоз Критичну масу нєвипочитоване”

автор м.джуджар
157 Опатрене

КУЛА/РУСКИ КЕРЕСТУР – Член Главного одбору и предсидатель Општинского одбору Лиґи социялдемократох Войводини Милорад Булатович сообщел же їх коалицийни партнер на локалних виберанкох, ҐГ Критична маса нє випочтовала першобутну догварку о заєднїцким наступу и предкладу кандидатох на лїстину под числом 5.

– Длужносц ми же бим ше обрацел явносци, нашим гласачом, симпатизером, подписнїком лїстини и кандидатом за одборнїкох котри требали буц на лїстини ҐГ Критична маса, а з нагоди нєпочитованя Коалицийного спорозуменя о виборе кандидатох. Случело ше цошка нєобчековане и єдинствене у политичним живоце – же би нам коалицийни партнер одредзовал кандидатох. Прето з тей нагоди поволуєм шицких подписнїкох, членох и симпатизерох ЛСВ општини Кула же би на виберанкох нє потримали лїстину за општински и предсидательни виберанки, а за републични вас поволуєме же бисце гласали за лїстину под числом 12 Вєдно за Войводину – Войводянє.

Окреме бим ше огляднул на подписнїкох и гласачох зоз Руского Керестура котри вишли у вельким чишлє нас потримац, з оглядом же догварка була же двойо кандидати буду зоз Руского Керестура. Тота догварка нєвипочитована, а лїстину ҐГ Критична маса составели по своїм виборе кандидатох, котри нє Руснаци, анї су нє зоз Руского Керестура. У старим лиґашким маниру поздравям  шицких наших симпатизерох и гласачох и жадам нам щесце на виберанкох 3. априла – поручел Милорад Булатович.

Най здогаднєме, лїстина ҐГ Критична маса придата Општинскей виберанковей комисиї соботу 13 марца на 11,45 годзин, чишлї 21 особу – седмеро зоз Кули, пецеро зоз Крущичу, по тройо зоз Липару и Сивцу, двоме зоз Руского Керестура, и єдно зоз Червинки. Зоз Керестура наведзени Ґоран Юрич на єденастим месце, и Милорад Ґрґурович на шеснастим месце обидвоме по занїманю роботнїки.

Лїстина преглашена на основи 500 подписох потримовки, нєурядово є составена зоз активистох вецей розличних странкох, у Керестуре обезпечени аж 117 подписи потримовки, а по коалицийней догварки ЛСВ требали припаднуц треце и седме место на лїстини.

ПОВЯЗАНИ ТЕКСТИ