Як випатра кед ше вецей як 300 млади зоз єденац язичних заєднїцох позбераю и маю єдно жаданє – пребудзиц виру и вибудовац одношеня хтори ноша мир? Праве така атмосфера означела Gen3 конґрес у Италиї, єдине паломнїцтво младих у нашей епархиї,  хторе було у новембру 2025. року. Учашїки зоз Сербиї, вєдно зоз парняками зоз Европи и швета, даскельо днї жили ритем заєднїцтва, хторе формовало порученє сновательки Руха фоколарох, Кяри Лубик: Лєм Бог остава – Бог хтори Любов.

Валентина Гарди з Руского Керестура

Того року сом була на сходу младих Gen3, гоч сом на початку нє була заинтересована пойсц. Прияву сом послала у остатнєй хвильки. Мойо думанє ше пременєло през молитву и верим же то була Божа воля.

Кажди дзень зме мали даяки активносци, преподаваня, и Службу Божу на хторей ше млади дзечнє уключовали и шпивали.

Представели зме Екуменски фестивал духовней музики Емаус фест, хтори орґанизуєме. Вичерали зме искуства и зоз Марґарет Каррам, предсидательку Руха фоколарох. Упознала сом ше з велїма людзми зоз розличних державох.

Нащивели зме Рим и Кярову хижу. Барз ми мило же сом мала нагоду прейсц през Святи дзвери под час Ювилейного рока и слухац папову конференцию. Мали зме вечар народох, дзе кажда держава представяла свойо традицийни єдзеня и танци.

Окремни упечаток на мнє охабел хлапец з Бразилу, хтори нам шведочел о своєй вири. Зочел ше з криминалом, дроґовал ше, а бул аж и у гарешту. На концу ше обрацел ґу Богови и рушел по правей драги.

На конґресу атмосфера була барз позитивна, шицки людзе мали щири ошмих на твари, франтовали и дружели ше. Шицки зме були єдно и могло почувствовац Исуса медзи нами.

Хелена Новта з Руского Керестура

Нє знала сом чи пойдзем на тото путованє. Кед ше могло приявиц, ище зме нє знали цо будзе на факултетох и чи почню робиц. Нєодлуга сом надумала же пойдзем, та цо будзе, будзе. Тото путованє почало скроз иншак як други путованя. Лєцели зме на авиону, то ми було барз интересантне, алє и дакус страшне искуство.

Кажди дзень починал так же зме мали духовни писнї и програму. Там були рижни програми, роботнї, молитви, шведоченя младих, а тиж зме ше и дружели. Упознала сом ше з велїма младима людзми, з хторима сом бешедовала по анґлийски о нєкаждодньових темох.

Наинтересантнєйше ми було на преподаваньох о споведзи, дзе нам перше млади з Болгарскей пречитали молитву, а потим зме шицки мали нагоду висповедац ше. Барз ми мило же сом под час Ювилейного рока пошла до Риму прейсц през Святи дзвери и же сом достала подполни одпуст.

Кристина Сопка з Руского Керестура

Нашо путованє до Италиї почало 10.11. на 2 рано, бо зме мали лєциц на авиону на пол 7 годзин. Були зме вистати прето же зме вчас станули, алє тиж и возбудзени, бо зме мали путовац на авиону. Медзитим, накадзи зме сцигли на аеродром у Риме, мой куфер бул страцени. После пополньованя паперох у служби за страцени ствари, пошли зме до Кастел Ґандолфу.

Пачело ше ми же кажди дзень друга держава водзела програму. На одбойки, котра була єдна з роботньох, ми було интересатно, бо сом ше през бависко могла упознац зоз велїма младима людзми хтори иншаки од нас.

Док зме представяли Емаус фест, мала сом вельку трему, бо було вецей як 300 младих людзох. Шицко добре прешло, гоч сом ше дакус збунєла док сом бешедовала, алє то розумели лєм Македоци, Горвати и ми.

Кед зме ишли до Ватикану слухац папову конференцию, моя ґрупа нє була скроз напредку, та сом го нє видзела зблїзка, алє сом чула барз поучни виреченя. У Риме зме нащивели рижни церкви, Колосеум…

Хвильки хтори нє забудзем то кед ми гварели же ми страцени куфер (после даскелїх дньох го нашли) и кед зме чекали сендвичи у Риме, бо чловек хтори там робел вишол и почал завивац як вовк. Барз длуго зме ше после того шмеяли.

Ксения Катрина з Руского Керестура

Перши упечатки з Gen3 барз позитивни. Першираз сом лєцела на авиону, а у Италиї нас людзе дочекали з ошмихом, полни з любову.

Интересантно ми було на преподаваньох, прето же сом научела вельо того о будованю, чуваню и дзелєню мира. Мир бул у каждей хвильки – у розгваркох, роботньох, друженю… Слова хтори гварел папа на мнє зохабели моцни упечаток: Ви будучносц церкви, алє тиж так мушице буц и терашньосц. Упознала сом ше зоз товаришками, хторих интересую исти ствари як и мнє, и то ми барз значело. Там зме єдли вельо пасти и пици.

Тото цо сом видзела на Gen3 стретнуцу ме мотивовало же би сом и после ширела мир и знанє, и же би сом жила мир и идеал у каждей хвильки.

Гоч ше помали приблїжує конєц рока, Ювилейни рок и далєй тирва. То рок у хторим нас Церва вола же бизме ше врацели, очисцели шерцо и же бизме одкрили радосц у пребачованю и моц нового початку. Нїхто нє пребарз далєко, анї є нє нательо брудни же би нє могол буц очисцени. Бог чека нашо ГЕЙ. Нє забудзце же у Водици и у Церкви св. Отца Миколая можеце прияц подполни одпуст. То нагода же бисце охабели шицко нєдобре за собу и рушели далєй з чистим шерцом.

Кристина Ковач з Нового Саду

Були зме у Риме на стретнуцу, котре орґанизовал Рух фоколарох вєдно зоз Марийовим дїлом. Тото путованє ми значело, бо зме мали нагоду упознац ше зоз новима людзми, видзиц нови култури и места о котрих зме лєм слухали.

Нащивели зме и Кастел у Риме, а там ми було окреме интересантно, бо то историйне, велїчествене место и єст нєвироятни погляд на город Рим.

Найбаржей ше ми пачело же зме нащивели Ватикан, а окреме же зме видзели папу. То була хвилька хтору нє мож дожиц кажди дзень и хтора ми останє у паметаню. Шицким бим препоручела, кед дакеди пойду до Риму, най нащивя Базилику святого Петра и простор коло нєй, бо то єдно з найлєпших и найпозантших местох котри сом видзела.

Останю ми у паметаню друженя, людзе з других жемох з хторима сом ше упознала, алє и хвильки у котрих сом ше могла повязац з Богом и сама зоз собу. Похопела сам же людзe з других державох нє роздумую вше иншак од нас.