Лєтни календар

автор и. сабадош 1. юлий 2022

Будуци штредньошколци през три днї того тижня, од пондзелку по стреду, покладали Закончуюци испит зоз мацеринского язика, математики, и комбиновани тест зложени зоз историї, ґеоґрафиї, физики, хемиї и биолоґиї. На основи витворених резултатох, а спрам лїстини жаданьох, упишу ше до штреднєй школи, наздаваме ше тей хтору першу вибрали и найбаржей сцели.

Того року, за розлику од даскельо контроверзних ситуацийох з предходних рокох, нє було векши пригварки лєбо нєправилносци под час тродньового тестираня, лєбо голєм ище нє одгукли по медийох. На щесце, нє було анї потенциялного загрожованя безпечносци школярох и наставнїкох пре ствари за хтори вони нє одвичательни, а пре нашо упарте левитованє медзи нєбом и жему, млатком и ковадлом…

Углавним, як мож чуц и пречитац од будуцих штредньошколцох, тести их нє нєсподзивали, и були обчековани. Составяче задаткох очиглядно на розуме мали факт же ключни три закончуюци класи основней щколи були вшелїяки лєм нє порядни, и же би нє було по правдзе цену корони наплациц осмаком.

Кед о нас конкретно слово, по нєурядових информацийох, керестурска штредня школа на єшень би требала мац красне число першокласнїкох, и у обидвох оддзелєньох ґимназиї, и на туристичним напряму. Но, треба почекац най прейдзе упис бо плани, жаданя и наздаваня нє вше випадню так як зме думали.

А тераз, Ружа! Пред нами наш найстарши и найвекши фестивал рускей култури. Сезону руских лєтних фестивалох прешлого тижня отворела „Веселинка” у Новим Садзе, потим нам шлїдзи „Коцурска жатва”, вец и шлїдуюци фестивали и манифестациї по других наших штредкох, алє „Червена ружа” заш лєм подїя и феномен з окремней, власней катеґориї. У остатнї час було пременки и у формату, и у розпорядку, и у кадровей структури тогорочного фестивалу, и рижни други проблеми и компликациї, алє, будзме реални, кеди, дзе и кому же наисце шицко пошло по планє? Найважнєйше же, як заключел єден челєднїк з младей орґанизацийней екипи, док нас цо „Ружи” жичиме добре заш лєм єст вецей, шицко будзе ок.

(Опатрене 22 раз, нєшка 1)