Мирослав Ступар найлєпши бавяч

автор З. Колєсар 2. фебруар 2016

Фодбалски клуб „Искра” внєдзелю, 24. януара, у Месней заєднїци у Коцуре отримал Рочну скупштину на котрей за найлєпшого бавяча преглашени Мирослав Ступар з Коцура.

Заключене же прешли рок за фодбалерох бул успишни и же пририхтованя за нову сезону почню 6. фебруара.

У Велькей сали Месней заєднїци у Коцуре Фодбалски клуб (ФК) „Искра” отримал Рочну скупштину, на хторей були коло 30 члени и симпатизере Искри, алє управа Клубу нє задовольна з таку слабу нащивеносцу, бо на Скупштину нє пришли анї шицки члени Предсидательства.

Звит о роботи у прешлим року поднєсол предсидатель ФК „Искра”, Виктор Ґрешак, котри оценєл же прешли рок бул успишни, понеже Искра полусезону закончела на першим месце на таблїчки, а освоєла и перше место на турниру СБ „Яша Баков”.

Тренер Здравко Бабич поднєсол звит о своєй роботи и пречитал статистични податки о каждому фодбалерови окреме и наявел же пририхтованя за нову сезону почню 6. фебруара.

Iskra

За финансийни звит бул задлужени Владимир Цап котри гварел же и попри шицких финансийних проблемох и нєпорядного финансованя од Општини Вербас, Клуб заш лєм рок закончел у плусу зоз 38,522 динарами у буджету.

На Скупштини ґолман Мирослав Ступар з Коцура преглашени за найлєпшого бавяча ФК „Искра” у прешлим року.

– Припознанє ми вельо значи, нє очековал сом го, бо єст ище добрих фодбалерох котри тиж заслужую буц наградзени, алє ми мило – гварел Ступар.

На схадзки наглашене же проблеми зоз котрима ше у наиходзацим периодзе зочи ФК „Искра” то бавяцки кадер, понеже троме бавяче одходза робиц до Словацкей, алє поведзене и же ше будзе патриц привесц нових бавячох и так змоцнїц  Клуб.

 Виктор Ґрешак, предсидатель Фодбалского клубуприсутних поинформовал о реорґанизациї лиґох, понеже ше Жабель и Титель одвоєли, та Искра припадла подручу Суботици и евентуални пласман до подручней лиґи ю одведзе до Подручней лиґи Суботица, место до Подручней лиґи Нови Сад як було дотераз.

(Опатрене 116 раз, нєшка 1)