Михаил – бронза, Ивана – злато

автор апал 14. юлий 2016

Першу медалю на Европским першенстве у атлетики хторе отримане прешлей нєдзелї  у Амстердаму за нашу репрезентацию освоєл у своєй дисциплини, дзешецбою, Михаил Дудаш. Значна  є прето же є перша у тей дисциплини хтору освоєла наша репрезентация на єдним таким змаганю атлетскей елити. Окреме же ю освоєл наш Руснак.

У возбудлївим змаганю дзешецбойцох, у остатнєй дисциплини – бежанє на 1 500 метери, Михаил витворел найлєпши резултат у сезони. Дражку пребегнул за 4 минути, 30 секунди и 90 стотинки. Зоз тим резултатом завжал осме место у тей дисциплини, а за друге место (стриберну медалю) хибели му у ґенералним пласману лєм штири боди. З дзешец дисциплинох на тим змаганю освоєл 8 152 боди.

На тим змаганю Михаил Дудаш на сто метери бежал 10,90 секунди,  до далєка скочел 7,44 метери, кулю руцел 14,24 метери (особни рекорд), до висока скочел 2,01 метер (рекорд Сербиї), 400 метери бежал за 49,45 секунди, у обегованї на 110 метери зоз препреченями бежал 14,55 секунди, диск руцел 45,65 метери, з палїцу лату прескочел на висини 4,70 метери, копию руцел 58,19 метери, а у обегованю на 1 500 метери зазначел рекорд Сербиї зоз часом 4 минути, 30 секунди и 90 стотинки. Зоз тима резултатами освоєл треце место у ґенералним пласману. Перше место освоєл репрезентативец Белґиї Томас ван ден Плетсен, а други бул Чех Адам Хелцелет.

Ивана Шпанович у дисциплини скаканє до далєка на Европским першенстве у Амстердаму освоєла златну медалю зоз резултатом 6,94 метери.

У першей сериї скочела вецей як седем метери, алє направела преступенє, а у другей призначела шампионски резултат (6,94 метери). До конца змаганя пробовала прескочиц седем метери, алє з оглядом же анї други атлетичарки нє були успишни, резултат зоз другей сериї бул достаточни за златну медалю.

НАЙЛЄПШИ РЕЗУЛТАТИ ПОТЕРАЗ

Премиєр Сербиї Александар Вучич и министер младежи и спорту Ваня Удовичич, вовторок, 12. юлия,  прияли атлетичарох Сербиї котри на Европским першенстве у Амстердаму освоєли два медалї и повинчовали им на посцигнутих резултатох. Успишним атлетичаром обецали же такой виплаца награди и же обезпеча шицко цо им потребне за успишни наступ на Олимпийских бавискох у Рию. У мено атлетичарох державнїком подзековал дзешецбоєц Михаил Дудаш.

– Атлетски союз препознава вельки таланти и резултати нє случайни. Я остатнї два роки мал вельки проблеми з калїченьом, з опадованьом резултату, а Союз и Министерство цали час були зо мну, давали ми потримовку и таки приступ ше врацел з тим успихом – гварел Дудаш на приєму у Влади Сербиї.

Як гварене у Атлетским союзу Сербиї, посцигнути резултати на Европским першенстве дотераз найлєпши у историї сербскей атлетики, бо попри двох медальох – златней Ивани Шпанович и бронзовей Михаила Дудаша, аж седмеро атлетичаре були у финалних змаганьох. На Олимпияду ше пласовали 12 атлетичаре Сербиї.

(Опатрене 131 раз, нєшка 1)