Можлївосци заєднїцтва у розличносцох

автор ора 7. юлий 2016

Прешлого тижня у Беоґрадзе ше одбули два значни подїї – промоция зборнїка „Єдна, Свята, Обща и Апостолска Христова Церква” зоз едициї „Студиа екуменика” и означованє „Папового дня” и 50-рочнїци отвераня апостолскей нунциятури у Беоґраду на вечаршей Служби Божей.

На промоциї Зборнїка „Єдна, Свята, Обща и Апостолска Христова Церква” вжали учасц троме католїцки владикове, числени високи госци з рижних институцийох, як и академик др Предраґ Пузович, декан Правословного Богословского Факултету у Београду. Тот зборнїк, то у ствари роботи зоз медзинародного симпозиюма отриманого прешлого року на Православним Богословским Факултету, а з нагоди 20. рочнїци од шмерци велького екуменского теолоґа Ива Конґара.

Медзи викладачами окреме цикави бул др Нико Икич, професор доґматскей теолоґиї зоз Сараєва, котри толковал рижне похопйованє папового Примату у общей Христовей Церкви и можлїве ришенє за обидва Церкви.

После того шлїдзела Служба Божа котру у церкви св. Петра у Беоґрадзе предводзел папски нунций Лучяно Сурияни зоз штирома католїцкима владиками зоз Сербиї и численима священїками обидвох обрядох.

На Служби бул присутни дипломатски кор, представнїки державних институцийох и шицки конфесийох, медзи котрима владика бачки др Ириней Булович и владика Арсений, викарни епископ патриярха Иринея.

Шпиванє провадзел хор опери Народного театра зоз Беоґраду под руководзеньом дириґента Дьордя Станковича, котри одшпивали и даяки часци Служби по старославянски, як цо то „Свят, свят” и други. Молитви вирних ше модлєло на рижних язикох цо ясно бешедовало о универзалносци Католїцкей Церкви и можлївосци заєднїцтва у розличносцох.

(Опатрене 99 раз, нєшка 1)