МОЖ КУПИЦ КОЛЯДИ РРЛ

 КОЛЯДИ РУСИНОХ/РУСНАЦОХ/ЛЕМКОХ
– писнї на чесц Рождества Исуса Христа

Заинтересовани за купованє кнїжки „Коляди Русинох/Руснацох/Лемкох – писнї на чесц Рождества Исуса христа” най ше явя до Канцелариї Рускей матки у Руским Керестуре, тел. (025)702-000, лєбо до месних/городского/регионалного одбору Рускей матки у Коцуре, Кули, Вербаше, Новим Садзе и Шидзе. Кнїжка кошта 7 еври, лєбо 1 000 динари.

Нова кнїжка у виданю Шветового конґресу Русинох/Руснацох/Лемкох „КОЛЯДИ РУСИНОХ/РУСНАЦОХ/ЛЕМКОХ – писнї на чесц Рождества Исуса христа” видрукована концом новембра прешлого року. Явносци є представена 5. децембра 2014. року у Свиднїку, на Другим Медзинародним фестивалє мултижанровей русинскей музики „Русин фест”.

Ґарант того проєкта Шветового конґреса РРЛ бул Иван Чижмар, фолклорист и музични фаховец зоз Словацкей, а у реализациї обєдиньованя писньох на чесц Рождества Исуса Христа у шицких жемох у хторих нєшка жию Русинох/Руснаци/Лемки, на вецей як 350 боки у богато илустрованей кнїжки, з прикладним ЦД-ом, у тиражу од 700 прикладнїки, окремну увагу мали проф. др Михайло Фейса з нашей жеми, Наталия Гнатко з Горватскей, Юрий Шипович з Подкарпатя у України, др Марияна Лявинец з Мадярскей, о. Василь Бойчук з Румуниї, Боґдан Ґамбаль з Польскей и Джери Джамба з Америки.

Дюра Папуґа,
предсидатель Шветовей ради
Русинох (Руснацох/ Лемкох)