МОЯ БИЛА ГВИЗДА

автор ясмина дюранїн 18. децембер 2016

Лоньски Дїдо Мраз ми нїч нє принєсол… Окрем горучки и жими у носу, и то такей боляцей же сом нєпреривно чувствовала яґод же мам заглобени дуґов у носу. Анї видуц, анї зодрец…

Того року ше наздавам лєпшим обставином. Од початку новембра пиєм мед и куркуму, дюмбир, лимунов сок и червени ґрейпфрут. Ґу тому, кажди дзень пиєм по езер мґ витамину Ц, єм виключкани зарна жита и вежбам йоґу. Тей жими, як би млади поведли – нафурам имунитет. Сцем буц здрава през швета! Нє лєм пре шицко цо треба поробиц, алє сцем уживац у тей атмосфери.

Кедишик ше ми младши син опитал чи то ми купуєме дарунки и кладземе под крачун, чи то наисце постої Дїдо Мраз? Припознала сом му – дома ми кладземе, а на роботу приходзи прави. Но, най ше дзецко радує и вери, ище кус. То би и я верела кед би ми, окрем жими, принєсол дацо конкретне и дакус ме орозположел. Швета на то и служа – за радосц и опущованє. И, вшелїяк, за квиценє.

Нїч нє чудне же сом була медзи першима цо ше у єдней з милион предавальньох залїпели за авзлоґ з ґомбулями и рижнима прикрасками. Вошла сом нука и кажду сом пипла и поопатрала. Ша, то нє мож лєм так дочекац Крачун! Муши ше обдумац у хторих тонох буду ґомбулї, лампочки, икебани, парточки… и дзе положим тоту прекраааасну билу гвизду цо швици як на нєбе.

А на интернету єст громаду креативцох хтори зоз нїчого правя красоту. И мнє цошка швербя пальци, та будзем мушиц справиц даяке ремек-дїло. Уж и знам цо – алє… (вше єст алє ), будзе ми требац помоц, бо ми треба з пилку пререзац конар, поприбивац гвозди (а нє потрафиц до дротох зоз струю…). У дворе бим оквициц ядловец, а опрез уходних дзверох поставиц древко з краснима лампочками. Гм… мой ше зрадує…

Бо у нас так – я лєдво чекам оквициц, а мой розквициц. Я би най нам лампочки швица и воднє и вноци, а вон нє може заспац кед му клїпкаю и пред заджмуренима очми. Якбачу же му на Вилїю винка налєєм до дакус векшого погара, та скорей пойдзе спац. А вец себе направим уґодяй – наполнїм себе найкрасши погар, вшадзи доокола поуключуєм швичочки, лампочки, и билу гвизду, и дам себе на волю. А жима най вибива дзе лєм сце.

www.zenoblogija.com

(Опатрене 3,606 раз, нєшка 1)